Cristianos asturianos opónense al tratáu ente la XE y Turquía

Siete entidaes y 364 persones roblen un manifiestu n'apoyu a los refuxaos.

L'alcuerdu ente la Xunión Europea (XE) y Turquía pa la espulsión coleutiva de refuxaos a ésti últimu país nun apara de provocar reaiciones de refugu. Esti martes un grupu de cristianos y cristianes de la Ilesia asturiana, hasta'l momentu 364, xunto con Comunidad Adsis de Asturias, Comunidades Ictys, Comite Óscar Romero, Equipo Cáritas parroquial de Llaranes, Foro Gaspar García Laviana, Grupo Y de Asturias, y Justicia y Paz Franciscana (Parroquia de San Antonio de Xixón), espublicen un comunicáu n'asturianu y castellanu entituláu 'Querémoslos equí: vivos y con futuru' nel que demanden la suspensión de dichu pautu.

"Les persones refuxaes nun son una problemática, sinón homes y muyeres con histories concretes. A lo llargo de meses fuimos testigos del tratu que tán sufriendo nes fronteres europees; tamos llevantando muries nun continente que prometió nun llevantalos nunca más. La crisis humanitaria nun empieza n'Europa, empieza cola decisión tomada pola persona que tien de poner fin a la vida na so casa pa poder ser persona o, simplemente, pa poder ser", recuerden estes persones nel comunicáu, que llamen a la ciudadanía a plantase "énte les decisiones que los gobiernos tán tomando nun momentu nel que la población ta dando una respuesta solidaria exemplar".

Les razones son bien nidies: "esti tratáu fraya los derechos humanos, les bases d’equidá y xusticia sobre les que s'asienten el derechu internacional humanitariu y les polítiques migratories y alcuerdos roblaos ente los estaos miembros que prohiben espresamente la devolución de persones que son oxetu de persecución o víctimes de guerra; por creer que perpetúa'l conflictu y el sufrimientu deriváu d'él y, mui p’allá de solucionalo, pon la xestión de les vides de millones de persones nes manes del Gobiernu de Turquía, qu'amosó abiertamente'l so despreciu a los derechos y llibertaes civiles y polítiques reprimiendo al pueblu kurdu y llindando la llibertá d'espresión reiteradamente dientro de les sos fronteres, cuando non consintiendo crímenes d'estáu".

Por ello demanden al Gobiernu estatal en funciones —que paez desmarcase del alcuerdu al calificalu ayeri de "inaceptable"— que defenda nel Conseyu Européu la suspensión del tratáu. Tamién al Gobiernu d'Asturies que trabaye "por qu'esti tema y el sentir de la mayoría asturiana tea presente na axenda política, retomando'l so compromisu prioritariu cola cooperación al desarrollu y l'ayuda humanitaria dende'l puntu de vista presupuestariu y social". Por último, llama a la ciudadanía a participar nes concentraciones previstes mañana en delles ciudaes, ente elles Uviéu (18.30 hores, plaza d'España).