División d'opiniones ente los llectores d'Asturies.com sobre les sos preferencies pa conformar Gobiernu

El 'Conceyu Abiertu' amosó una división d'opinión ente los nuesos usuarios sobre les sos preferencies pa la conformación del Gobiernu del Estáu. Un 37 por cientu apuesta por un pautu pela izquierda, mesmu porcentaxe que los que prefieren eleiciones.

Poques veces hebo tanta igualdá en 'Conceyu Abiertu', la seición d'Asturies.com onde plantegamos cuestiones pa conocer la opinión de los nuesos llectores. El llunes pasáu llanzamos la entruga '¿Qué prefier pa gobernar l'Estáu tres el fracasu de la investidura de Pedro Sánchez?', con una coincidencia nos resultaos de dos de les trés respuestes posibles. Asina, un 37 por cientu declárase favoratible a un pautu pela izquierda ente'l PSOE, Podemos y Unidad Popular, mientres que'l mesmu porcentaxe d'usuarios apuesta por una convocatoria nueva d'eleiciones, situación novedosa dende la llegada de la democracia.

Per otru llau, un 27 por cientu ye partidariu de la gran coalición que pretende'l PP y que sumaría al PSOE y, posiblemente, a Ciudadanos. De momento, los partíos siguen coles negociaciones y el rei d'España, Felipe VI, entovía nun empezó cola ronda de contautos previa al encargu de formar gobiernu.

Dende esti momentu yá ye posible votar nun 'Conceyu Abiertu' nuevu. Nesta ocasión queremos conocer la opinión de los nuesos llectores sobre'l llobu tres la manifestación celebrada ayeri en Madrid, con representación asturiana, p'acabar coles matances d'estos animales y pidir que la especie sía protexida en tol territoriu estatal.