UNIDÁ critica la intención d'IX de "convertise nun aglutinante de la izquierda asturiana"

"La coalición UNIDÁ, formada por Izquierda Asturiana, Andecha Nacionaliega y dellos grupos locales, retrucó al traviés d'un comunicáu de prensa, a les declaraciones feches pol ex conseyeru y miembru d'Izquierda Xunida, Francisco Javier García Valledor, al selmanariu La Nueva España. Nelles Valledor caltenía que la so formación tendría de convertise nel aglutinante d'una fuerza qu'integre a la propia UNIDÁ y a Izquierda Asturiana, cubriendo asina l'espaciu políticu asturianu, d'izquierdes y verde.

Dende la Xunta Coordinadora d'UNIDÁ camienten que la formación a la que pertenez García Valledor ""nun tien nenguna credibilidá p'autoproponese como aglutinante d'un espaciu políticu al que traicionó, decepcionó y usó de forma permanente nos últimos años"".

Fechu que, dende'l puntu de vista de la formación, queda amosáu cola actuación del so partíu nel Gobiernu asturianu, lo que ""inhabilita pa promovese como motor d'una dinámica que yá demostró dende dientro y fuera del gobiernu que nun ye más qu'una operación cosmética pa tentar de frenar una decadencia qu'abulta resultar imparable"".

D'otru llau, UNIDÁ caltién que los sos oxetivos tán mui alloñaos de los oxetivos de la formación IX-BA-LV, sobre manera porque la formación considérase influenciada ""poles persones, colectivos y grupos políticos d'obediencia esclusivamente asturiana, tanto por una cuestión de principios como d'operatividá"".

Nesti sen, la coalición declara alcontrase ""nun intensu, autocríticu y fructiferu debate internu tanto na coalición como nes partes integrantes de la mesma"". Esti procesu, informa UNIDÁ, ""constitúi'l pasu previu pa desenvolver, primero del branu, un procesu d'unión que va dar llugar a la constitución d'una federación nacionalista asturiana que represente un espaciu demandáu por una parte de la sociedá asturiano"