D'Andrés quier un alderique públicu con Gotor

"La candidata al Rectoráu y catedrática de Drechu Internacional Públicu y Rellaciones Internacionales, Paz d'Andrés, propúnxo-y nel día d'ayeri al tamién candidatu y catedráticu de Química Orgánica, Vicente Gotor, la celebración d'un alderique públicu enantes de la xornada eleutoral del próximu 23 d'abril.

Paz d'Andrés (22,56%) y Vicente Gotor (49,29%), foron los candidatos con más votos na pasada xornada eleutoral del 15 d'abril. Por embargu, y como nengún de los dos llegó a la mayoría absoluta, afitada nel 50% los votos, van tener qu'enfrentase nuna segunda vuelta.

Nesta segunda cita coles urnes, la candidata Paz d'Andrés camienta que sería importante la celebración d'un alderique, un alcuentru que, dende'l so puntu de vista, tamién reclama la comunidá universitaria. Pela so parte, y énte la ufierta, Paz d'Andrés comunicó a los medios que sabía, al traviés de la so coordinadora de campaña Begoña Sesma, que Vicente Gotor nun yera partidariu de facer nengún tipu d'alderique por ser yá ""tarde"" y camentar que la comunidá nun lo necesita. Sicasí D'Andrés espera que ""finalmente acepte"".

D'otru llau dixo tar confiada en ""atropar tolos votos que na primer vuelta fueron pa otres candidatures"", sorrayando que la so candidatura nun pertenecía a nengún ""bloque"" y que presentaba ""un modelu d'universidá marcáu pola escelencia y ensin privilexos nin clientelismos"", polo qu'espera'l sofitu de xente de tolos ámbitos."