La ciudadanía sal a la cai esti 8 de marzu, Día Internacional de la Muyer Trabayadora

La Plataforma Feminista d'Asturies entama una manifestación esti martes con motivu del Día Internacional de la Muyer Trabayadora baxo'l lema 'Xuntes contra'l patriarcáu y el capital'. Va ser a les 19.30 hores en Xixón, con salida de plaza L'Humedal.

Nesta fecha conmemórase la llucha de la muyer pola so participación, en pie d'igualdá col home, na sociedá y nel so desarrollu íntegru comu persona. Vien celebrándose dende l'añu 1911, cuando Alemania, Austria, Dinamarca y Suiza fíxolo per primer vegada un 19 de marzu, pa pasar a xeneralizase en tol mundu magar l'añu 1975, cuando la Organización de Naciones Xuníes celebró l'Añu Internacional de la Muyer.

La convocatoria d'esta tarde, con salida en L'Humedal y final n'El Náutico, ye una de les munches actividaes conmemoratives y reivindicatives que se celebren güei per tol país. La Plataforma Feminista d'Asturies anima a los asistentes a participar cola so versión propia del popular cartelu 'We can do it!', llanzáu n'Estaos Xuníos mientres la Segunda Guerra Mundial.