Los productores de lleche amenacen con "desabastecer" el mercáu

"Los productores de lleche de les comunidaes cantábriques y de Castiella y Lleón, que sumen sobre'l 90% de la cuota llechera española, amenazaron esti xueves con entamar una fuelga pa protestar pola baxada del preciu de la lleche que-yos paguen les industries del sector.

La posibilidá d'entamar movilizaciones ""pa desabastecer"" los mercaos va analizase nes próximes selmanes. Enantes, los ganaderos d'estes zones van mantener los contautos pa formar una plataforma ""que lo único que quier ye defender los drechos de los ganaderos españoles"", como afirmó ún de los sos voceros, José Pedro Egocheaga.

A lo llargo la mañana decidieron sumase a la iniciativa la plataforma tolos ganaderos de fastera occidental asturiana. L'alcuerdu foi tomáu na celebración d'un conceyu, al qu'asistieron más de 200 productores, celebráu en Tapia. Nesti alcuentru participaron tamién representantes del sector de la provincia de Lleón, confirmando'l so voceru, Roberto Fernández, que ""práuticamente'l 100%"" de los ganaderos de la provincia decidieron sumase a la plataforma"", ""pa defender el nuestru trabayu"".

Pedro Egocheaga esplicó que la situación pola que ta pasando'l sector llecheru ""ye insostenible"" dempués de que'l preciu de la lleche que paguen les industries rexistrara una baxada constante dende qu'entamó l'añu. Nestos momentos, esplicó, los ganaderos tán recibiendo por llitru de lleche ente 39 y 42 céntimos, ""una cantidá que nun cubre los gastos de producción"". Por exemplu, como esplicó Roberto Fernández, el costu que tien d'encarar un productor pa producir un llitru de lleche ye d'unos 40 céntimos. Amás, camienten que'l futuru será peor, ""yá que s'anuncia otra baxada d'uno seis céntimos pa esti mesmu mes"".

Los productores acusen direutamente a les industries llecheres de ""pautar"" esa disminución del preciu de la lleche, ""polo que diben tar incumpliendo la llei de competencia"". Tamién se-yos acusa de poner nel mercáu lleche de ""calidá duldosa"", importada de países como Francia. ""Por traer lleche d'otres zones, qu'amás ye de menor calidá que la nuestra, báxenmos el preciu"".

Amás de la reducción de precios, aseguren que les empreses ""incumplen les tases pautaos"", col sector. ""Alcordamos un preciu pola lleche, páguennosla con un mes de retrasu y pa enriba al preciu qu'ellos dicen"", afirma José Pedro Egocheaga, quien sorrayó qu'esta situación supón que los titulares de les esplotaciones dexen de percibir una media d'ente 1.200 y 1.500 euros al mes pola reducción de los precios."