"Llangréu, un llibru abiertu"

"El conceyu de Llangréu va celebrar el Día'l Llibru, el próximu 23 d'abril, con una selmana enllena d'actividaes lliteraries. Amás de la propia fecha conmemorativa del 23 d'abril, el conceyu desarrollará una bona riestra d'actos que van allargase más nel tiempu. Unes selmanes nes que va haber llectures públiques ya institucionales, conferencies, presentaciones de llibros, cuentacuentos nes escueles y biblioteques del conceyu, cine, campaña d'animación a la llectura en llingua asturiana, programes específicos nes escueles y esposiciones igüen una selmana celebraciones que traten d'afalar vezos llectores de tola xente'l conceyu.

""Llangréu un llibru abiertu"" celebra la llectura con actividaes qu'entamen el día 23 cola llectura pública qu'esti añu va facese en Ciañu n'alcordanza y homenaxe a José León Delestal. Dende'l día 2 de mayu y hasta'l 16 de mayu va poder visitase na Casa la Cultura Sama la esposición El País de Graeslinjú, un llugar máxicu onde viven los grandes escritores de la lliteratura infantil y mozo. Les sos vides, les sos histories y los sos grandes personaxes al traviés d'un percorríu enllenu fantasía, misteriu ya imaxinación.

Rescamplen tamién la campaña d'animación a la llectura en llingua asturiana y les conferencies que van poner Luis Sepúlveda y Diego Medrano, amás del actu Presentaciones cruzaes nel qu'escritores de la sonadía de Pablo Antón Marín Estrada, Pablo Rodríguez Medina y Naciu Varillas presentarán y falarán de les sos últimes obres: Secretos y dos sombres, Perreríes y El camín de Dios. En resume, un programa d'actividaes pa tola selmana per tol conceyu y destinaes a toles franxes xeneracionales."