La mocedá asturiano dedica'l 59% del salariu a pagar una vivienda

"CC.OO ellaboró un estudiu sobre la ""Situación de la mocedá asturiano no tocante a la vivienda"" nel que, ente les sos conclusiones, rescampla'l fechu de que la renta media de los menores de 34 años ye de 12.524 euros brutos añales demientres que l'alquiler d'un pisu nuevu ronda los 931,5 euros al mes. De magar estos datos, el sindicatu calcula que si nun baxa'l preciu de la vivienda nin se crea emplegu estable y con salarios dignos ""va ser imposible que los mozos s'emancipen"".

Según el citáu informe, los mozos asturianos tienen que dedicar hasta'l 59,8 por cientu del so salariu a pagar una vivienda.
Según el sindicatu, ""los más de los mozos asturianos siguen na vivienda familiar a edaes nes que tendríen de tar viviendo les sos propies vides de mou independiente"" y los principales problemes que torguen la emancipación de los xóvenes nesti momentu ""tán venceyaos cola situación del mercáu llaboral y de la vivienda"".

Esta realidá esplica que'l 64,8 por cientu de la mocedá asturiana con edaes comprendíes ente los 18 y los 34 años tovía nun creara casa propia, y que la tasa d'emancipación de la mocedá (34,9%) seya la segunda menor d'España, onde por términu mediu'l 45,2% de los mozos ta emancipáu, según datos del tercer trimestre del 2007. L'informe de CC.OO d'Asturies recuerda que la tasa d'emancipación española ye, al tiempu, una de les más baxes d'Europa.

El sindicatu recueye nel so informe los datos de la Encuesta de Población Activa, nos que se conseña que de cada cien asturianos con edaes comprendíes ente los 18 y los 34 años, 27 nun trabayen nin busquen emplegu, otros nueve tán desemplegaos; 27 tienen un emplegu temporal; 30 tienen un emplegu indefiníu, y 7 trabayen por cuenta propia. De la mesma manera, y según los datos de l'Axencia Tributaria, los mozos asturianos ingresaron nel añu 2006 una media de 12.524 euros brutos en conceutu de salarios.

""N'Asturies ye precisamente la situación del mercáu llaboral, y non tanto la del mercáu inmobiliariu, lo qu'esplica los baxos niveles d'emancipación de la población moza"", caltién el sindicatu. Sicasí, l'informe de CC.OO sorraya que ""el bien básicu que ye la vivienda ta, dende hai años, fuera mano de munchos ciudadanos, ente los que tán xóvenes, persones desemplegaes con emplegu precariu, inmigrantes, persones d'edá y otros coleutivos asitiaos na llende de la solvencia"".
Per otru llau, ente'l primer y el tercer trimestre del 2007, l'esfuerzu financieru que tendría d'asumir una persona xoven pa mercar una vivienda llibre n'Asturies aumentó un 8,39% hasta algamar un nivel equivalente al 59,8% de tol so salariu, mui lloñe ""de la llende máxima d'adeudamientu xeneralmente aceptáu poles entidaes financieres, que s'asitien nel 30% de la renta"", según el sindicatu. A esta situación únese, según CC.OO, la baxada de la promoción de viviendes protexíes. N'Asturies, ""la edificación llevantada pol sector públicu siguió una camín cuesta p'abaxo n'Asturies a lo llargo de la década de los noventa, pasando d'entamase más de 1.800 viviendes protexíes en 1992, a menos de 400 nel 2000"", según el sindicatu.

No que cinca al alquiler, l'informe de CC.OO sorraya que n'Asturies menos del 12% (unes 19.652) de les viviendes esistentes tán n'alquiler, un porcentaxe asemeyáu a la media española, demientres que n'Alemaña ta nel 62%, n'Holanda nel 52% en Francia nel 46%."