Los socialistes asturianos y estremeños "averen postures" no tocante al Estatutu

"Una delegación del grupu socialista nel Parlamentu d'Estremadura ta visitando estos díes Asturies pa participar nun alcuentru de trabayu colos responsables del Grupu Parlamentariu Socialista na Xunta Xeneral del Principáu. Nel aconceyamientu de trabayu van tratase temes venceyaos a la futura reforma del Estatutu d'autonomía en dambes comunidaes.

A la llegada de la delegación estremeña, el socialista asturianu Fernando Lastra, calificó de ""positiva"" la visita, al camentar que ye necesario averar les postures na ellaboración de los Estatutos d'Autonomía.

Ta previsto qu'esti xueves la Presidenta de la Xunta Xeneral del Principáu, María Jesús Álvarez, reciba a la delegación estremeña nel Salón Europa de la Xunta Xeneral. Darréu va tener llugar una visita peles dependencies del parlamentu.
La delegación estremeña va tar compuesta por Ignacio Sánchez Amor, voceru del grupu parlamentariu socialista; Francisco Torres Gil, secretariu xeneral del grupu parlamentariu; Ana María Soguer Gómez y Manuela Frutos Gama, dambes responsables de la direición del grupu parlamentariu; Valentín García Gómez, voceru de la estaya de Fomentu; y José Luis Velilla Sanz, de la estaya de Mediu Ambiente.

Los miembros del grupu parlamentariu socialista na Xunta Xeneral del Principáu que participen nel alcuentru son el voceru Fernando Lastra Valdés; Álvaro Álvarez González, cabezaleru na Comisión d'Economía y Asuntos Europeos y Elena Díaz Palacios, secretaria xeneral.

El voceru del grupu parlamentariu socialista d'Estremadura, Ignacio Sánchez Amor, declaró nel día d'ayeri tar trabayando pola mor d'una reforma del estatutu y non ""una fundición de la Comunidá Autónoma"". Asina sorrayó que ""nun hai que dexase llevar pol discursu territorial de la lexislatura pasada na que talamente paecía que'l país diba quedar pates p'arriba""."