Un tanque israelí mata al cámara de l'axencia Reuters en Gaza

"L'exame médicu al que se sometió al cámara de Reuters muertu esti miércoles na Franxa de Gaza amuesa que morrió por dardos de metal d'un proyeutil d'un tanque israelí qu'estalló nel aire, según indicaron los médicos que lu atendieron.

Les radiografíes mostraes polos médicos qu'examinaron el cuerpu de Fadel Shana nel hospital Shifa de Gaza enseñen dellos d'estos dardos nel pelu y les piernes del reporteru palestín de 23 años. Amás, atopáronse dellos d'estos dardos de trés centímetros na cazadora de Shana, que llevaba'l rótulu 'Press' (prensa), y nel so vehículu, un coche deportivu blindáu coles señales ""TV"" y ""Press"".

Shana taba cubriendo los acontecimientos d'esta selmana en Gaza pa Reuters cuando foi alcanzáu por un proyeutil israelí. ""Les pruebes del exame médicu sorrayen la importancia d'una investigación rápida, honesta y imparcial per parte del Exércitu israelí y el Gobiernu"", afirmó l'editor xefe de Reuters News, David Schlesinger. ""Les marques nel vehículu del Fadel Shana dexen a les clares y ensin ambigüedá que yera un periodista profesional faciendo'l so trabayu. Nós y los militares debemos trabayar xuntos de manera urxente pa entender por qué se produxo esta traxedia y cómo puen evitase incidentes asemeyaos nel futuru"", añadió.

Cientos de persones, los más periodistes locales, participaron esti xueves nel funeral de Shana. El so cuerpu, envueltu nuna bandera palestina, y la so cámara y cazadora fueron tresportaos en camilles separtaes."