Alonso va aconceyar en Madrid el 9 de marzu pola especialidá

El conseyeru d'Eduación y Cultural confirma que'l decretu va facelu Asturies, "pero pidirémos al ministeriu que lu reconoza".

Genaro Alonso respondió asina a una entruga de la diputada Concha Masa, d'Izquierda Xunida, sobre la normalización del asturianu, faciendo énfasis na situación de la negociación de la especialidá docente de Llingua Asturiana y Gallego-asturiano. Nesti asuntu, el conseyeru confirmó que se taben dando pasos alantre y que tenía previsto una reunión de la comisión de trabayu entamada xunto col Ministeriu d'Educación y Cultura pal 9 de marzu.

“El decretu fadrémoslu nós, pero pidirémos al ministeriu que lu reconoza”, afirmó Alonso, que recordó que l'Abogáu del Estáu alvirtió hai unos meses que la creación de la especialidá ye una competencia de la comunidá autónoma al tratase de materies llingüístiques d'especial promoción. Nesi sen, el conseyeru caltién una postura contraria a la de l'Academia de la Llingua Asturiana, qu'entiende que ye'l ministeriu'l qu'ha de crear la especialidá.

Masa continuó la so intervención afirmando que "la escuela ye fundamental pa la perviviencia de la llingua" y confirmó'l compromisu del so partíu na normalización de la llingua y na defensa de los derechos de los sos falantes. “De prohibiciones y represión yá tuvimos bastantes dosis nos años prietos de la dictadura”, aseguró.

Pela so parte, Alonso comprometióse a llevar al máximo la potencialidá de la Llei d'Usu y Promoción del Asturianu y a desendolcar les midíes de normalización espuestes por la Direición de Planificación Llinguística y Normalización na esposición parllamentaria d'aniciu de llexislatura, coincidiendo con Masa na necesidá de que la llingua nun ha de ser un problema.