Gotor y Paz d'Andrés a segunda vuelta

"El catedráticu de Química Orgánica de la Universidá d'Uviéu, Vicente Gotor, foi'l candidatu más votáu nes elecciones que se celebraron esti martes al Rectoráu de la institución académica asturiana. Gotor algamó'l 49,29% de los votos, siguíu pola catedrática de Drechu Internacional Públicu y Rellaciones Internacionales Paz Andrés, col 22,56%. Tres d'ellos, asitióse'l catedráticu d'Álxebra, Santos González, (19,43%), y el catedráticu de Medicina Preventiva y Salú Pública, Antonio Cueto (8,72%).

El resultáu obliga a celebrar una segunda vuelta que van disputar Vicente Gotor y Paz d'Andrés, como segunda clasificada. La votación va ser el día 23 d'abril.

El tovía rector, Juan Vázquez, fizo un analís de los resultaos namás conocese los datos definitivos. Asina, agradeció ""una xornada normalizada y l'estilu de los cuatro candidatos a lo llargo la campaña"". Un espíritu que, según Vázquez, ""failos nobles por querer ser rectores"". Valoró tamién como ""positivos"" la datos de participación d'estes elecciones universitaries.
Vicente Gotor, pela so parte, calificó de ""escelentes"" los resultaos algamaos, qu'atribuyó al fechu de que contó con un ""grupu plural"" constituíu dende hai tres años. Al empar, calificó'l so proyeutu como""un proyeutu de pesu"" basáu nel ""trabayu honráu y anovador"". Gotor añadió que'l so programa ta abiertu y ""nun necesita integrar a naide porque nunca dexó fuera a naide"". Nesti sen, garantizó ""que va siguir trabayando nos próximos díes"". ""Si llogramos ganar, vamos entamar el llabor difícil de la converxencia europea de la escelencia"", dixo pa finar, afirmando que va facer ""un Rectoráu pa toos, ensin sectarismu; una universidá unida p'algamar lo meyor pa toos"".

Pela so parte, Paz d'Andrés agradeció l'apoyu a la so candidatura. ""Toi contenta cola campaña y el resultáu algamáu"", aseguró. De la mesma manera, añadió que na segunda vuelta'l so proyeutu ""va tar abiertu a tolos que quieran unise p'algamar la escelencia docente ya investigadora y conectar a la universidá cola sociedá"". Asina, allarga la mano a los que ""na primer vuelta apoyaron a otres opciones"", pa lo que va trabayar nos próximos díes ""con fuerza y entusiasmu"". ""Podemos facenos con ello"", finó.

Santos y Cueto agradecieron tamién l'ayuda recibida durante la campaña y nesta xornada, y ufiertáron-y el so sofitu ""al candidatu que resulte ganador pa trabayar pol bien de tola comunidá universitaria""."