La Comarca la Sidra súmase a la campaña "Muéyate cola llingua"

"El presidente de la Mancomunidá de la Sidra, Alejandro Vega Riego, xunta cola Xefa de la Oficina de Política Llingüística del Principáu d'Asturies, MªAntonia Pedregal Montes, presentaron esti martes la campaña de normalización llingüística ""Muéyate cola llingua"", qu'entamará col repartu de materiales pa los sectores comercial y hosteleru de la Comarca la Sidra. Nel actu tamién tuvieron presentes representantes de los conceyos que componen la Mancomunidá: Bimenes, Cabranes, Colunga, Nava, Sariegu y Villaviciosa; asina como miembros del Patronatu de Turismu.

Les campañes tán entamaes dende'l Serviciu de Normalización Llingüística de la Comarca, n'andecha cola Conseyería de Cultura y Turismu y los conceyos que formen la Rede de Normalización Llingüística.

La campaña de promoción pal sector de la hostelería ""Muéyate cola Llingua"" quier complementar la campaña ""Equí tas en Casa"", que tantu ésitu tuvo nel pasáu añu y naz col oxetivu cimeru de favorecer l'usu del asturianu en tolos establecimientos que lo deseen ""teniendo en cuenta que ye ún de los sectores onde se caltién d'una manera más viva l'usu de la llingua asturiana"". La campaña ta compuesta por 800 serviyeteros col eslogan de la campaña, ""Muéyate cola Llingua"" (""Equí tas en Casa"") per una cara y pela otra con un poema d'Andrés Solar; 5.000 posavasos col mesmu eslogan; 300 Cartelos promocionales centraos en mundu de la hostelería y, más en concretu, de la sidra pal so espardimientu pelos negocios de la comarca; y pa finar 300 cartelos que faen referencia a la prohibición de vender tabacu a menores.

Pela so parte la campaña del comerciu pretende ""incrementar la percepción del asturianu como llingua vehicular que val pa desenvolvese ensin problemes nes xeres diaries"", llanzando asina una campaña compuesta por 900 espetos colos nomes de los productos n'asturianu destinaos a caúna de les xebraes estayes del comerciu col eslogan ""Ye Como Ye""; 15000 bolses de plásticu col eslogan ""Lo que Necesites, lo que Quies, lo que te Presta"" y a lo cabero una riestra de cartelos de rebaxes con un diseñu modernu nel que rescampla l'elementu llingüísticu.

Nel actu de presentación Alejandro Vega Riego, dempués d'agradecer a la Xefa'l sofitu del Principáu pa col Serviciu, emponderó'l llabor que se vien faciendo dende la Rede de Normalización Llingüística nos Conceyos a favor de la normalización social del asturianu. Arriendes d'esto, comentó que la Mancomunidá qu'él preside vien dende va años ""moyándose cola llingua"", y fizo referencia a les campañes de promoción que dende la mancomunidá vienen desenvolviéndose, amás del procesu de recuperación toponímica nel qu'esta comarca ye cabezalera, tando tolos conceyos que la componen colos espedientes peracabaos.

Pela so parte, La Xefa de la Oficina de Política Llingüística agradeció la invitación de la Mancomunidá a esti actu de presentación, valorando mui positivamente les actuaciones que tanto dende la Mancomunidá como de los conceyos que la componen tán llevando a cabu pa ""da-y a la llingua asturiana la visibilidá y el puxu de los que tien menester"". Emponderó asina mesmo les dos campañes, a les que-yos adivinó un gran éxitu y de les que dixo que se complementen col trabayu que se vien faciendo dende la Oficina de Política Llingüística del Principáu."