El fiscal pide reabrir el casu del Yak-42

"El teniente fiscal de l'Audiencia Nacional, Fernando Burgos, pidió esti martes la reapertura del casu de les identºificaciones de 30 de les 62 víctimes del accidente del avión Yakovlev-42, porque, dende'l so puntu de vista, los mandos militares ficiéronla d'un mou ""arbitrariu"" y a sabiendo de que yera incorreuta.

Na vista d'apellación al dictáu del pasáu mes de payares del xuez Fernando Grande-Marlaska, que se celebró esti martes énte l'Audiencia Nacional, Burgos pidió volver a abrir la investigación al camentar que nel procesu d'identificación de los cuerpos hubo ""una mutación de la verdá"" nunos documentos ""con trescendencia xurídico-pública y xurídico-privada"".
La Fiscalía acusa d'un delitu de falsedá documental al xeneral médicu Vicente Navarro, que foi l'encargáu d'ellaborar la llista de los 62 muertos; y a los dos oficiales médicos qu'ellaboraron los informes de necropsia, el comandante médicu José Ramírez y el capitán médicu José Sáez. Les families de les víctimes tamién acusen al xeneral del Exércitu del Aire José Antonio Beltrán, que dirixó la comisión militar responsable de les identificaciones y la repatriación de los cuerpos.

L'accidente del Yakolev-42, que tuvo llugar en Trabzon (Turquía) el 26 de mayu del 2003, causó la muerte de 62 militares españoles que tornaben d'una misión n'Afganistán. Esto significó la mayor catástrofe de les Fuerces Armaes Españoles en tiempos de paz. Según el relatu de los fechos realizáu pol representante del Ministeriu Públicu, cuando los cuerpos llegaron a la base aerea de Torrejón de Ardoz, na alborada del 28 d'agostu del 2003, el xeneral Navarro ""rellenó los espacios que taben en blancu"" nel llistáu de víctimes ellaboráu poles autoridaes turques y españoles, dempués d'ordenar la realización de les autopsies a los cadabres non identificaos y emitir los correspondientes certificaos de muerte. En Turquía nun s'asignaron identidaes a estos 30 cuerpos porque, según esplicó Burgos, ""nun hubo tiempu pa facela, nun había medios y amás nun se pidió""."