Lo menos 1.200 persones executaes polos estaos nel 2007

"En 2007 foron executaes lo menos 1.200 persones en 24 países, pero'l númberu podría ser entá mayor si se sumen les execuciones secretes de los Estaos, como pasa col casu de China, Mongolia o Vietnam, según queda conseñao nun informe espublizáu pola organización en defensa de los drechos humanos Amnistía Internacional, que sorraya amás les 27.500 persones condenaes a muerte nel mundu.

El concretu'l númberu de persones executaes en 2007 foi de lo menos 1.252 y les condenaes, en 51 países distintos, sumaron un total de 3.347. D'esti mou les execuciones xubieron l'añu pasáu en dellos países. Esti ye'l casu d'Irán (317 persones énte les 177 executaes en 2006), Arabia Saudí (143 énte 39) y Paquistán (135 énte 82).

El 80 por cientu de toles penes de muerte quedaron repartíes ente cinco países: China, Irán, Arabia Saudí, Paquistán y Estaos Xuníos.

D'otru llau la organización espresa'l so esmolecimientu pola aplicación secreta de les penes de muerte. En China, por exemplu, - onde la organización contabilizólo menos 470 execuciones en 2007 - afítase que les execuciones son un secretu d'Estáu, polo que namás ""les autoridaes chines saben exautamente'l númberu de persones asesinaes baxo l'autorización del Gobiernu"". Poro, según la responsable de campañes ya investigación d'Amnistía Internacional, María del Pozo, ""fai falta llevantar el velu del secretismu"".

Dende'l so puntu de vista, y dao que ""munchos gobiernos afirmen que les execuciones se faen col sofitu de la ciudadanía, ye necesario qu'ésta conoza lo que se ta faciendo nel so nome""."