IX diz que l'alderique sobre la capitalidá ye una "cortina de fumu"

"Los responsables d'IX d'Asturies declararon esti martes que, dende'l so puntu de vista'l PSOE ta tentando esparder l'enfrentamientu sobre la capitalidá d'Uviéu pa ""tapecer"" un ""pactu"" col PP col qu'aprobaríen una reforma del Estatutu d'Autonomía que ""condergará"" a los asturianos a tener que conformase con un estatutu ""de segunda"".

Les considerances d'IX lleguen un día dempués de que l'alcalde de Cangues d'Onís, el socialista Alfredo García, manifestare la so intención de solicita-yos a los grupos parlamentarios la inclusión de Cangues como capital política.
Por embargu, según manifestaron los responsables d'IX, l'alderique sobre la capitalidá ye una ""cortina de fumu"" pa tentar tapecer el pactu ente'l PSOE y el PP p'aprobar un Estatutu ""de saldo"" p'Asturies. ""Pa distraer l'atención pública, los socialistes y la drecha asturiana quieren montar una griesca sobre un tema que nun esmolez pa nada a los asturianos"".

Asina mesmo recordaron qu'IX, al traviés del so grupu parlamentariu, defenderá na Xunta Xeneral del Principáu d'Asturies la necesidá d'un Estatutu ""que garantice drechos y organice un modelu institucional capaz de dar rempuesta a los problemes de los asturianos. Un testu estatutariu ""con conteníos y ambiciosu"", onde lo qu'esmolez nun ye ónde ta la capital sinón ""reconocer el drechu a una vivienda digna o la garantía d'unes condiciones de vida dignes pa los asturianos y asturianes""."