Los partíos asturianos esponen les sos propuestes estatutaries

"El voceru del grupu socialista na Xunta Xeneral del Principáu, Fernando Lastra, dixo nel entamu de les conversaciones pa la ellaboración del nuevu estatutu qu'optaría por conservar la fórmula del llistáu de competencies na reforma, anque'l grupu entá nun decidió'l tipu de métodu escoyíu pa llevalo a cabu. El PP, pela so parte, apuntó que la reforma de competencies del Estatutu d'Autonomía asturianu va facese na llinia d'otres Comunidaes Autónomes, ya Izquierda Xunida tomó como referencia los modelos catalán y andaluz.

Asina quedó espresao polos representantes de los tres partíos dempués del conceyu celebráu na mañana del llunes ente los miembros de la ponencia estatutaria na sede parlamentaria. Trátase del primer aconceyamientu de la Ponencia tres recibir l'Informe Xeneral sobre la reforma del Estatutu del lletráu mayor del Parlamentu Asturianu, el pasáu 17 de marzu.

PSOE, la tesis continuista

""La posición del grupu ye caltener el modelu de llistaos de competencies"", apuntó Lastra. ""L'aconceyamientu de güei anticipa puntos de vista diferentes y va tratase d'utilizar el procedimientu y la estructura que permite un Estatutu más acordies colo que pensamos"", señaló'l voceru socialista. ""L'oxetivu ye trabayar por bloques temáticos, non tanto por artículos nin por títulos, sinón por bloques que s'identifiquen pa los ciudadanos y los ponentes"", indicó Lastra. Asina, los tres grupos decidieron entamar la reforma pol ámbitu de competencies.

La Potencia va estudiar si la reforma se produz según el modelu de llistes o por sistemes distintos adoptaos por otres comunidaes. Nesti sen, la diferencia principal ente IX y PSOE ye si s'opta pol métodu emplegáu por Andalucía y Cataluña - qu'encara una descripción detallada de caúna de les competencies - o pol del llistáu de competencies vixente nel actual Estatutu asturianu.

""Nun descartamos nin consideramos negativu'l llistáu de competencies que tien l'actual Estatutu, y respetando'l que tien Cataluña o Andalucía, tampoco consideramos que seya tan espectacular"", señaló'l socialista en rellación a la percepción del so grupu. Pal diputáu la reforma parte d'un Estatutu que ""ta bastante bien"", polo que nun tendría de suponer ""un cambiu radical sobre la estructura vixente nin en materia competencial nin n'otres"", destacó. Lastra interpreta que lo que va facese ye ""reformar la téunica, l'orde y la modernización de la estructura estatutaria pa superar dalgunes de les sos ambigüedaes o contradicciones sobre les novedaes sociales y polítiques actuales, pero non l'ámbitu estructural"".

PP, l'apueste por siguir na llinia d'otros procesos

El voceru del Grupu Popular, Ovidio Sánchez, opina pela so parte que ""hai un llistáu llarguísimu de competencies que yá fueron algamándose nes nueves reformes por nuevos Estatutos, munchos d'ellos asemeyaos al nuevu, polo que vamos tar nesi campu marcáu pola Constitución, ensin dulda dala, y ensin nenguna posibilidá de salir d'ella, porque nin lo queremos nin pensamos qu'esi seya'l camín"", sorrayó'l diputáu y presidente del PP n'Asturies.

""Esta ye la primer xunta con calter definitivu pa la reforma del Estatutu. Camiento qu'hai mui bon ambiente ente los miembros de la comisión que vamos trabayar pa facer la reforma"", garantizó Sánchez.

Los tres grupos consensuaron esti llunes que la primer estaya a tratar na reforma seya la de les competencies, por ser ""la parte más significativa de la reforma y la más identificada colos ciudadanos"", dixo Sánchez. ""Cuando falamos d'autonomía nel fondu tamos falando de munches coses, pero sobre manera del exerciciu direutu de competencies qu'enantes-y correspondíen al Estáu"", opinó'l diputáu 'popular'.

IX, tres les güelgues de Catalunya y Andalucía

El voceru del grupu parlamentariu d'Izquierda Xunida, Jesús Iglesias, señaló en declaraciones a los medios que'l so grupu apuesta por asemeyar les competencies nel Estatutu d'Autonomía coles remanaes nos testos andaluz y catalán. Pa Iglesias hai una diferencia que va tener d'esclariase pal próximu llunes, basada en ""cómo espeyar nel Estatutu les competencies qu'Asturies va tener y el nivel de les mesmes"". Izquierda Xunida apuesta por siguir la llinia marcada nos estatutos d'Andalucía y Cataluña nos que se desarrolla una descripción detallada de caúna de les competencies autonómiques, de manera que ""caúna tien el so artículu y nél defínese'l nivel y el conteníu competencial"".

""Esa fórmula ye la que meyor favorez un incrementu del nivel d'autogobiernu de la Comunidá Autónoma"", aseguró'l voceru d'IX. Poro, esti modelu va ser la fórmula alternativa qu'IX va defender el próximu llunes énte al sistema actual. El testu vixente desarrolla les competencies pente medies d'un artículu nel que se rellacionen les competencies de calter esclusivu, otru nel que rellacionen les competencies de desarrollu llexislativu, y otru qu'incorpora aquelles que son de mera execución, y n'otros artículos faise referencia, tamién a dalguna competencia en concreto, según esplicó Jesús Iglesias."