"Esti ataque supón un saltu cualitativu del nivel de represión que solemos tener", asegura Pulgar

El vetu al asturianu na Xunta Xeneral lleva a la XDLA a movilizase al suponer "un saltu cualitativu del nivel de represión que solemos tener". Esti miércoles entamó una protesta convocada d'urxencia frente al Parllamentu, nel que tornó a apaecer la Pita, p'anunciar una concentración 'Pola digninidá del asturianu' pal xueves 25.

"Siempre la reservamos pa los momentos más indicaos", apunta Carlos Pulgar, voceru de la Xunta pola Defensa de la Llingua Asturiana (XDLA). Y ye que la situación lo merez: "Esti ataque supón un saltu cualitativu del nivel de represión que solemos tener", afirma.

"Ye dalgo surrealista. La propia llei recueye'l derechu a emplegar l'asturianu a tolos ciudadanos, y los diputaos y trabayadores de la Xunta Xeneral tamién son ciudadanos", añade Pulgar, qu'apunta a la oficialidá como la única manera de salvar esta situación.

Sobre'l polémicu tweet de Mercedes Fernández, el voceru de la XDLA apunta que la presidenta del PP n'Asturies "quitóse la careta. Yá conocemos bien la so postura dende los años 90. Diz que nun hai conflictu llingüísticu, pero cuando s'usa l'asturianu con normalidá apaecen los pantasmes del pasáu".

El xestu de Fernández

Entrugáu si la parte positiva d'esta polémica torna a ser la importante reación social, Pulgar asiente. "Tuvo repercusión dientro del movimientu de reivindicación llingüística y tamién fuera d'él. La xente respondió ante esti ataque brutal. La cuestión yá entra nel terrén del respetu a los demás".

El voceru de la XDLA atendió a Asturies.com tres una convocatoria urxente p'anunciar la concentración prevista pal xueves 25 a les 17 hores frente a la Xunta Xeneral baxo'l lema 'Pola dignidá del asturianu'. Dellos militantes, acompañaos pola Pita, mostraron una pancarta y glayaron 'oficialidá' nel momentu nel que, por coincidencia, salía del edificiu Fernández, que respondió con un xestu de 'non' cola mano enantes de xubir a un coche.