Los 17 ministros del nuevu Gobiernu prometen los cargos

"Los 17 ministros que componen el nuevu Executivu de José Luis Rodríguez Zapatero prometieron esti llunes énte los Reis y el nuevu presidente del Gobiernu ""cumplir con fidelidá"" les obligaciones de los sos cargos y ""con llealtá al Rei"".

Les nueve muyeres y los ocho homes del nuevu Gobiernu escoyeron, como yá lo ficiera'l sábadu'l xefe del Executivu na so toma de posesión, la fórmula de la promesa en cuenta la xura. Los ministros prometieron los sos cargos cola mandrecha enriba un exemplar de la Constitución abiertu pela páxina correspondiente al Títulu IV sobre'l nomamientu de los ministros y al llau d'una Biblia abierta pel llibru de los Númberos, nel capítulu referente al votu y xuramentos.

El primeru en prometer llealtá al cargu foi'l titular de Xusticia, Mariano Fernández Bermejo, quien pudo asina conseñar como Notariu Mayor del Reinu na promesa de los sos compañeros de Gabinete. Na ceremonia, presidida polos reis, acompañaos por Rodríguez Zapatero, actuaron como testigos los presidentes del Congresu y del Senáu, José Bono y Javier Rojo, respeutivamente, y los máximos representantes del Tribunal Constitucional (María Emilia Casas) y del Supremu y del Conseyu Xeneral del Poder Xudicial (Francisco José Hernando).

Tres les promeses, los reis felicitaron personalmente a caún de los ministros y retratáronse xunta'l nuevu Executivu al completu. Según informa RNE, Zapatero bromió nesi momentu col so ministru del Interior, Alfredo Pérez Rubacalba, al que-y dixo: ""tú siempre a la mandrecha"", pol llugar que-y tocaba ocupar na semeya. Al marxe de la semeya de grupu, la reina dexóse fotografiar coles nueves ministres del nuevu Gobiernu, el primeru na historia d'España con más muyeres qu'homes, mientres que'l rei interesóse pol embarazu de Carme Chacón, primer ministra de Defensa de la histora d'España."