Berlusconi torna a la presidencia italiana

"El cabezaleru de la coalición de centru-drecha, Silvio Berlusconi, ganó les elecciones col 47,15% de los votos nel Senáu énte'l centru-izquierda de Walter Veltroni, qu'algamó'l 38,167%.

No que cinca a los resultaos algamaos polos partíos, el Pueblu de les Llibertaes (Pdl) foi'l más votáu, col 37,797% de los votos, demientres que la Lliga Norte algamó'l 8,317% y el Movimientu pa l'Autonomía'l 1,035%. El Partíu Democráticu (Pd) quedó col 33,861% de los votos, y la Italia de los Valores (Idv), col 4,305%.

Los otros partíos que se presentaben a les elecciones con posibilidaes de tener participación parlamentaria, la Unión de Centru y la Izquierda Arcu Iris, algamaron nel Senáu'l 5,680% y el 3,220% de los votos respeutivamente.

Si se confirmaren estos resultaos, tanto la Unión de Centru como la Izquierda Arcu Iris quedaríen fuera de la Cámara Alta, onde la llende asítiase nel 8% de los votos. Por embargu, tovía hai qu'esperar a los resultaos rexonales, yá que l'asignación de los escaños nel Senáu ye rexonal.

Na Cámara de los Diputaos, onde l'escrutiniu de datos entamó más tarde, el centru derecha algamó'l 46,391% de los votos - el 36,249% pal Pdl, el 9,224% pa la Lliga Norte, el 0,916% pal Movimientu pa l'Autonomía-. La coalición de centru izquierda algamó'l 37,965% - el 33,645% pal Pd y el 4,319% pa Idv -. La Unión de Centru quedó na Cámara de los Diputaos col 5,6% de los votos, la Izquierda Arcu Iris, col 3,090% y la Destra, col 2,412%. Nesti casu, los partíos que nun algamen el 4% de los votos tampoco van entrar nesta cámara parlamentaria."