Cien díes de Virgili ensin novedaes pa col asturianu

Nun hebo aumentu nel porcentaxe de programación en llingua asturiana na TPA.

Antonio Virgili ta acabante de cumplir cien díes como direutor xeneral de la RTPA, cargu nel que taba en funciones dende'l 2011, y nun hai novedá nenguna nel ente públicu de comunicación no que respeuta al asturianu. Too ello a pesar de qu'hai más de seis meses que se robló l'alcuerdu ente la FSA-PSOE y IX, col oxetivu d'investir a Javier Fernández como presidente del país, nel que s'afitaba un incrementu de la presencia del idioma na RTPA.

"La falta de voluntá de Virgili viose tamién estos últimos díes al proponer al Conseyu d'Alminstración una nueva dirección de Conteníos Dixitales en cuenta d'una de Conteníos n'Asturianu que valiera p'afalar la presencia de programes na llingua propia", apunten dende Iniciativa pol Asturianu, coleutivu que recuerda que tovía falten por cubrir dellos puestos de dirección "que son estratéxicos pa la sobrevivencia del idioma". Por ello, pide a les fuercies polítiques firmantes del alcuerdu "que cumplan colos sos compromisos y que l’asturianu gane espacios de normalidá, con tresversalidá y calidá, na RTPA".

Otra manera, la organización cívica quier destacar que l'ente públicu ta viviendo "una cayida hestórica de les audiencies", que, no que llevamos d'añu, "baxaron al 4 por cientu, datu qu'amuesa los perxuicios de nun apostar pola llingua propia", dao l'interés "qu'espierten ente los ciudadanos los programes n'asturianu, siempres con mui bonos datos".