IX pide la retirada del topónimu "Ría de Ribadeo"

"El diputáu autonómicu d'IX-BA-Verdes, Francisco Javier García Valledor, va pidir na Xunta Xeneral del Principáu la ""correición"" del topónimu Ría de Ribadeo y la so sustitución pol de Ría del Eo, tal y como proponía l'Academia de la Llingua Asturiana.

Nuna nota prensa, Valledor espón que con esta aición el Gobiernu Asturianu dexa amosao ""el so escasu o nulu interés, el baxu pesu políticu énte l'Estáu y la subordinación énte'l gobiernu gallegu, asina como'l so despreciu al sentir de los asturianos del Navia-Eo"" .

Nesti sen, la coalición presentó una proposición non de llei énte'l parlamentu asturianu na que recuerda que la Comisión Xeográfica Nacional, dependiente del Conseyu Superior Xeográficu, ta acabante d'adoptar la decisión de nomar la Ría del Eo como Ría de Ribadeo. Esta decisión adóptase, n'opinión del diputáu asturianu, ""de manera paradóxica a pesar de la escasísima tradición qu'esti topónimu tien tanto n'Asturies como na Comunidá vecina de Galicia"".

Poro, IX-BA-Verdes considera que'l Gobiernu del Principáu d'Asturies amuesa ""la so falta d'interés y de pesu políticu a la hora de defender los intereses de los asturianos nesti casu, de la toponimia, que tien un valor singular y simbólicu nel occidente asturianu"". Valledor recordó que na pasada llexislatura'l Gobiernu d'Asturies ellaboró un informe toponímicu sobre la Ría del Eo realizáu sobre'l terrenu de dambes orielles de la ría y que plantegaba que'l nome común utilizáu tanto n'Asturies como en Galicia ye'l de Ría del Eo. Dichu informe foi presentáu al final de l'anterior llexislatura. Según IX, na actual llexislatura, la Conseyería de Cultura encargó un nuevu ""estudiu qu'afitaba les mesmes conclusiones"".

Por ello, na proposición non de llei IX pide al parlamentu asturianu qu'encamiente ""al Conseyu de Gobiernu a dirixise a l'alministración Central col envís de presionar al Conseyu Superior Xeográficu pa retomar la denomación de Ría del Eo""."