Dos profesores catalanes editen una axenda solidaria en llingua asturiana pa maestros

Anna Palencia y Carlota Hernández entamen esti proyeutu —que va destinar parte de los sos beneficios a Save the Children— pa facilitar el día a día a los maestros. Tres una primer esperiencia, y pola demanda esistente, faen una versión n'asturianu.

"Trátase d'una axenda de maestros en DINA4 qu'inclúi contautos, tutoríes, fueyes d'evaluaciones, observaciones...", esplica Hernández, qu'afonda na importancia que dan al diseñu na so iniciativa. "Normalmente estes axendes suelen dar una respuesta únicamente funcional, dexando dalgo de llau'l diseño, y eso ye dalgo que quiximos incorporar", añade la maestra catalana que conforma xunto con Palencia y una ilustradora '2 profes en apuros', un espaciu nel que comparten idees, recursos, reflexones y esperiencies sobre educación p'ayudar a compañeros de profesión.

Tres editar la primer 'Agenda para profes n'apuros' en .pdf n'agostu en catalán, castellanu y inglés, con un importante ésitu —7.683 descargues namái'l primer día—, les dos maestres decidieron "tomárnoslo como dalgo más serio de cara al cursu que vien". Asina naz el proyeutu d'esta axenda con fines solidarios, con versiones tamién n'eusquera, gallegu y asturianu.

"Los pidimientos de la xente lleváronnos a incorporar l'asturianu, al menos na versión dixital", esplica Hernández, que contó pa la torna col sofitu d'Iniciativa pol Asturianu. Pa que la versión física tamién sía una realidá, '2 profes en apuros' tien en marcha una campaña de cuestación popular na rede al traviés de la plataforma Verkami, cola intención de recaudar 6.500 euros. Les persones que collaboren, amás de l'axenda, van recibir delles recompenses.

De momento, en poco más d'una selmana yá consiguió más de 2.000 euros gracies a la collaboración de 108 mecenes, y la intención ye completar nun mes la cantidá presupuestada pa poder disponer de les axendes pa mayu. El 10 por cientu del preciu de cada axenda va destinase a Save the Children, "una ONG venceyada colos niños, que cree na educación como'l filu conductor pa camudar la realidá de éstos".

Collaboración d'una empresa asturiana

Amás de l'axenda en formatu físicu, '2 profes en apuros' tamién va trabayar nuna versión dixital. Pa ello va contar cola collaboración de la empresa asturiana de creación recién Gomeru Apps.