La mocedá asturiano chúmase con un modelu "más nórdicu", según Sanidá

5 Febreru, 2016 por Redacción

Sanidá percibe un cambéu de modelu mediterraneu, que va asemeyándose al nórdicu: amenorgar el consumu diariu, pero concéntralo n'enfiles de fin de selmana - Un 4 % de la población de más de 15 años sufre un riesgu crónico pa la so salú por cuenta de la inxesta d’alcohol.

Les muyeres doblen o tripliquen a los varones nel usu de hipnosedantes en tolos grupos d’edá. El director de Salú Pública presentó güei l'estudiu Situación del consumu de drogues y alcohol del Principáu d'Asturies 2014

El 33,5 % de los varones asturianos d'ente 14 y 18 años d'edá y el 31 % de les moces d'esa franxa d'edá reconocen que s'enfilaron nos últimos trenta díes. Na población adulta, sicasí, les diferencies por sexos son muncho más acusaes, de forma tala qu’un 7 % de los varones almite que s’enfiló nel últimu mes frente a namás un 2,6 % de muyeres. Esti fechu fai pensar nuna futura equiparación del consumu d'alcohol ente homes y muyeres, según pon de manifiestu l’estudiu Situación del consumu de drogues y alcohol del Principáu d'Asturies 2014, que presentaron esta mañana'l director xeneral de Salú Pública, Antonio Molejón, y el director del Plan de Drogues p'Asturies, José Ramón Hevia.

L'informe revela un cambéu nos hábitos de consumu n'Asturies: pasóse d'un modelu mediterráneu a otru nórdicu, de mayor riesgu, qu'amenorga'l consumu diariu d'alcohol, pero concéntralo n'enfiles de fin de selmana, sobremanera ente la xente mozo.

Del análisis d'estos datos tamién s'esprende que s'amenorgó'l consumu de tabacu y incrementóse l'usu de hipnosedantes en tolos grupos d'edá, sobremanera ente les muyeres.

L'estudiu, que tamién incide nel importante impactu que tien l'alcoholismu sobre los recursos asistenciales del Principáu, ta venceyáu a la nueva Llei del Principáu d'Asturies d'Atención Integral en Materia de Drogues y Alcohol y va dexar definir la situación real de la población no que fai al consumu de drogues y los sos efectos negativos sobre'l sistema sanitariu.

“El so oxetivu ye ufiertar a la sociedá asturiana, polo xeneral, y a les persones y colectivos más concerníos nesti problema, sobremanera, la meyor información empírica posible sobre esta realidá pa tratar d'amenorgar los daños y potenciar les meyores condiciones de salú de la población”, según esplicó'l director de Salú Pública.

Estos son dalgunos de los datos más relevantes del informe.

    Consumu d'alcohol. Un 4 % de la población de más de 15 años sufre un riesgu crónico pa la so salú por consumu d'alcohol. Los supuestos de mayor riesgu, enfiles, atracones y consumu diariu manifiéstense siempres con mayor fuerza nos grupos de menos edá y ente los mayores de 55 años. Na población adulta, beben más alcohol los homes que les muyeres. Sicasí, ente los estudiantes de secundaria les moces beben más que los mozos nes categoríes de “consumos nos 30 díes últimos” y “consumu de fin de selmana”, mentes que los varones d'estes edaes tienen mayores porcentaxes de “consumu nos díes llaborables”, “a diariu”, “enfiles nos 30 díes últimos” y “atracones d'alcohol”.
    Tabacu. El porcentaxe de fumadores diarios n'Asturies ye llixeramente menor que la media d'España nos homes (27,5 % frente al 27,8 %) y llixeramente superior ente les muyeres (23,6 % frente al 20,2 %). Constatóse un descensu de la prevalencia de consumu diariu de tabacu na población adulta, sobremanera ente los homes, mentanto que na población estudiantil hai más moces que llograron dexar de fumar.
    Hipnosedantes. Les asturianes multipliquen por 2 y por 3 los porcentaxes d'usu de tranquilizantes, sedantes o somníferos de los homes en tolos grupos d'edá y en toles categoríes de consumu. Na población de 14 a 18 años vese la mesma pauta de xéneru que nos adultos, anque non d'una forma tan acusada.
    Cannabis. Ye la droga de comerciu illegal más utilizada. Un 14,8 % de la población (más homes que muyeres) almite consumir “cannabis” nel últimu mes. Ente los estudiantes de secundaria, dende 1994 hasta 2002/04 producióse una medría del consumu, pa empecipiar depués una pauta descendente.
    Impactu nos servicios asistenciales. L'alcohol conduz a los recursos asistenciales de desintosicación y deshabituación a más del doble de persones que la heroína, la cocaína y el cannabis xuntos. La so incidencia aumentó, amás, nos últimos diez años al pasar del 50 % al 60 %, lo mesmo que'l cannabis, que pasó del 3 % a más d'un 10 %. Por sexu, les persones almitíes a tratamientu son sobremanera varones, nuna proporción de 8/9 por cada 1/2 muyeres. Esta relación, que varia en función del tipu de drogues, modifícase radicalmente nel consumu de fármacos hipnóticos y sedantes, onde les muyeres concentren la inmensa mayoría de les almisiones a tratamientu.