Más de cien persones vindiquen la Oficialidá énte la Xunta Xeneral

"Más de cien persones concentraron esti llunes énte la Xunta Xeneral del Principáu d'Asturies pa desixir la reconocencia de la oficialidá de la llingua asturiana nel Estatutu d'Autonomía que resulte de la reforma qu'entamaba cola celebración de la ponencia.

La concentración taba convocada pol Conceyu Abiertu pola Oficialidá, llevando los asistentes delles pancartes de diferentes colores col testu ""Oficialidá"" que foron colocaes na entrada principal de la Xunta Xeneral. Al empar, colgáronse de les rexes qu'arrodien l'edificiu delles fueyes con pallabres n'asturianu, como alcordanza, molín o neñina.

Demientres la protesta, cantáronse conseñes yá clásiques como 'Oficialidá', 'L'Asturianu llingua oficial', o 'Yá, yá, yá, oficialidá', sobre manera a la entrada de los políticos de los diferentes partíos. Dalgunos d'ellos, como los diputaos d'Izquierda Xunida Noemí Martín y Francisco Javier García Valledor, amás del voceru del Bloque por Asturies, Rafael Palacios, participaron na protesta.

El voceru del CAO, Fernando Ornosa, llamó a la ""responsabilidá"" de los partíos políticos, pa que ""nun zarren esta reforma estatutaria ensin aprobar la oficialidá de la llingua asturiana"". ""Ye la única garantía de supervivencia del asturianu"", recordando amás que si una llingua ""nun s'oficializa, nun existe, ye invisible"". Al mesmu tiempu vindicó'l ""principiu d'igualdá ente los ciudadanos de diferentes comunidaes autónomes"", recordando aquellos llugares con llingua propia oficial (Galicia, País Vascu, Cataluña, Comunidá Valenciana y Islles Baliares), y recordó la necesidá de que ""l'asturianu puea usase nel ámbitu públicu y priváu"". ""Hasta nel ámbitu priváu, yo nun pueo nin facer un contratu de compraventa, nin un testamentu, nin un rexistru matrimonial n'asturianu"", finó."