Somos Avilés presentará un ruegu al Plenu pa esixir el cumplimientu de la toponimia

Tres la polémica colos cartelos de Les Niñades y Llaranes Vieyu.

La candidatura de xunidá popular entiende que la recuperación de los nomes de llugar tradicionales "ye fundamental pa nun perder la identidá, la historia y la cultura propia; trátase d’un asuntu que tresciende lo meramente político al entrar nel terrén de la memoria colectiva y sentimental d’esos llugares". Tamién recuerda qu'estes denominaciones son oficiales dende'l 2010 y que cola aprobación del espediente toponímicu'l Conceyu ta obligáu a "adecuar de manera progresiva, acordies coles sos posibilidaes presupuestaries y, en tou casu, nel momentu de la so renovación, les rotulaciones en víes públiques y carreteres asina como de mapes y planos oficiales a les formes toponímiques establecíes nesi decretu, cuestión ésta que, polo que se ve, l’Ayuntamientu d’Avilés nun cumple".

Por esti motivu, Somos Avilés va llevar al Plenu de febreru un ruegu "p’amosar el nuestru rechazu a esta situación y esixir al gobiernu local que cumpla cola llei, que nun se vuelvan a producir casos asemeyaos y tamién qu’inste al INE y demás organismos estatales a utilizar los topónimos correctos del conceyu". Entiende que, "anque nunca fora de manera tan simbólica, nun ye la primer vez qu’esta llegalidá toponímica nun se respeta n’Avilés y ello vien a demostrar una falta d’interés por parte del consistoriu reiterada y reprobable".