Los Vaqueiros d'alzada presenten candidatura a Pueblu Exemplar

"La "Asociación Cultural Vaqueiros de Alzada" d'Asturies, acaba presentar énte la Fundación Príncipe d'Asturies la so candidatura al Premiu al Pueblu Exemplar d'Asturies 2008, pola so "defensa del patrimoniu natural y ecolóxicu, los fondos raigaños culturales, tradiciones, ricu folclor y sacrificáu esfuerzu a lo llargo los sieglos".

Según informó'l presidente de la entidá, Gonzalo Gayo Corbella, al traviés d'una nota prensa, "los vaqueiros d'alzada fueron y son los verdaderos guardianes del paraísu natural que ye anguaño Asturies".

"La so actividá ganadera y les tierres peles que caminaron durante sieglos pola mor de la trashumancia contribúin a caltener una ñatura que ye güei'l mayor patrimoniu de los asturianos".

Los vaqueiros d'alzada ocuparon zones de tol occidente asturianu y anguaño pue reconocese l'orixe vaqueiru pente medies de los sos apellíos: Gayo, Cano, Feito, Garrido, Barrero, Parrondo o Freige, ente otros.

Na Casa Cultura de Tinéu quedó afitada, fai cuasi ocho años, l'Asociación "Vaqueiros de Alzada", siendo los socios fundadores: Gonzalo Gayo, Juan García Gayo y Ángel Fernández Parrondo. L'Asociación quier facer por recuperar les costumes, tradiciones y arguyu vaqueiru, al empar qu'esparden la so cultura al traviés de les universidaes y los fondos bibliográficos.
 
Más información sobre los Vaqueiros d'Alzada
"