Les Comadres abre l’Antroxu asturianu modernu

Asturies va vivir dende esta nueche cinco díes de folixa, mázcares y gastronomía. Llega l’Antroxu, festividá asturiana que nel pasáu entamaba col solsticiu d’iviernu y qu’agora, tres la recuperación acontecida col fin del franquismu, resúmese a les xornaes previes al Miércoles de Ceniza.

La primer cita ye’l Xueves de Comadres, xornada na que les muyeres axunten pa comer y pasar una xornada festiva. Anque l’orixe d’esta folixa pue tar fuera del Antroxu tradicional, esta cita tan asturiana considérase l’entamu del Antroxu modernu. Xixón y La Pola Siero son les villes que nos años últimos mantienen con fuercia esta tradición que caltuvieron per munchos años les cigarreres de la fábrica de tabacos de Cimavilla.

Éstes, xunto a les sos fíes y collacies, xubíen hasta La Providencia a pasar la tarde en compañía femenina y disfutar de viandes y postres típicos del Antroxu, como naranxes, teresites, frixuelos o casadielles. Mentes, en La Pola les muyeres diben al conocíu como Prau Malatu o Prau Picón a merendar bollos preñaos, sidra y casadielles. Güei, la folixa treslladóse de la tarde a la nueche y munchos restoranes ofrecen menús especiales pa esta xornada.

El llabor de la Tertulia Feminista Les Comadres

Ye de destacar tamién el llabor de la Tertulia Feminista Les Comadres pa potenciar esta fecha festiva. Esti grupu de muyeres entama tolos años una espicha na qu’entreguen dos premios: el comadre d’oru y el felpeyu, ésti últimu a persones o entidaes que desprecien a la muyer.

La premiada esti añu ye la doctora en Filosofía y profesora titular de Filosofía Moral y Política en la Universidad Rey Juan Carlos de Madrid,  Ana de Miguel Álvarez, "pol so trabayu sobre'l feminismu como movimientu social y la  construcción de nuevos marcos teóricos d'interpretación de la realidá".

Dende esti coleutivu destaquen que les sos espublizaciones últimes se centren "na busca de claves pa comprender cómo se reproduce la desigualdá sexual nes sociedades formalmente igualitaries, sobre manera ente la mocedá, sobre'l marcu teóricu de la violencia de xéneru y sobre la prostitución como escuela de desigualdá humana".

Mentes, la tamién doctora en filosofía Alicia Miyares, nel so casu pola Universidá d'Uviéu, va recibir una comadre d'oru especial "como reconocimientu y agradecimientu pol testu del manifiestu 'Yo decido', presentáu nel Congreso de los Diputados el 1 de febreru de 2015. Nel llau de los antipremios, el títulu de felpeyu recala nel arzobispo de Granada, Francisco Javier Martínez Fernández, "por atrevese a dicir 'Aborto y divorcio son los que promueven la violencia de género'". Completa la llista de gallardonaos l'alcalde de la población almeriense de Carboneras, Salvador Hernández, "por dicir la babayada 'Cállese cuando está hablando un hombre'”.

La folixa, na que se prevé la presencia de la sardina del Antroxu xixonés, como ye vezu, va tener llugar nel Llagar Castiello a les 20.30 hores y va consistir nuna espicha cola actuación d’Assia.

Rio de Janeiro o Tenerife ganen a la tradición

Los antroxos de Xixón y Avilés son los más importantes en cuantes a programa institucional y participación. Música y delles actividaes más orientaes a asemeyase a los carnavales de Rio de Janeiro, Tenerife o Cádiz qu'a otra cosa, protagonicen estes xornaes na que la xente participa antroxándose, anque con mázcares lloñe de la tradición. Los vienres ye habitual ver a los neños antroxaos nos colexos y en Xixón les charangues calecen motores pal concursu d’estes formaciones del sábadu y del domingu, que yá va pola so ventésimu octava edición, con una participación alta.

El sábadu, los focos van p’Avilés, onde se celebra’l XXIX Descensu Internacional y Fluvial de Galiana a partir de les 18.30 hores. Una gran cantidá de chigres de la ciudá antróxense pa estos díes –nesti añu la temática ye la Grecia clásica– pa participar nun concursu entamáu polos comerciantes de la ciudá y la xente sal a la cai coles sos mázcares pa pasar una xornada de folixa.

El domingu ye’l Domingu’l Gordu, que na tradición yera celebráu polos homes y que nel Antroxu modernu resúmese a les actividaes programaes polos conceyos. Mentes, la xornada siguiente ye’l día grande, el Llunes d’Antroxu, cola celebración d’un desfile peles cais de les villes y l’allargue de la folixa hasta bien entrada la madrugada. Ésti ye’l día más desenfadáu del añu y nel que la xente tien más costume por antroxase, sobre manera la más mozo.

El xolgoriu del Antroxu termina’l Martes d’Antroxu col Entierru la Sardina –n'Avilés celébrase'l miércoles–, cuando un conxuntu de plañideres acompañen a la sardina, que representa a don Carnal, nun cortexu fúnebre tres la so muerte.

Ye’l final del Antroxu y l’entamu de la Cuaresma col Miércoles de Ceniza; de la vixilia y de la preparación pa la Selmana Santa. Por ello, ye nesta xornada cuando se disfrutaba de la comida y la bébora n’escesu, n’especial la carne. Güei, d’esta tradición, queda’l menú d’Antroxu tan solicitáu nos restoranes asturianos y na que’l gochu, al ser época de matanza, ye protagonista. Asina, el que venden los establecimientos xixoneses ta compuestu por un pote asturianu, picadiellu y los postres típicos d’esta época, como los frixuelos y les picatostes.

En delles ciudaes d’Asturies les festividaes d’Antroxu celébrense fuera de les feches tradicionales, en plena Cuaresma, como ye’l casu de Mieres del Camín, Uviéu o La Pola Ḷḷena. Nesti casu respuende a intereses de la hostelería d’eses villes más qu’a otra cosa, dexando pa prau una tradición perguapa yá de por sí alloñada del so espíritu ainicial por mor de los tiempos modernos y del dañu que fixo la dictadura de Franco a les tradiciones populares.

Les persones que quieran conocer de primer mano l’orixe del Antroxu asturianu y les sos peculiaridaes pueden disfrutar de la serie realizada por Xurde Morán na seición ‘Ye tiempu de…’ d’Asturies.com na que nun falta un detalle d’esta folixa.

Conferencia sobre l'Antroxu na tradición

La Lliga Celta d'Asturies entama mañana n'Avilés una charra venceyada a esta festividá de nome 'L'Antroxu na tradición asturiano'. Va encargasa de dala Cristobo de Milio, miembru de la Fundación Belenos y autor del llibru 'La creación del mundo y otros mitos asturianos', na sala de conferencies del Palaciu de Valdecarzana magar les 19 hores.