Gran remontada de Farho Xixón Baloncestu tres dir perdiendo por venti puntos

"Trunfu apuráu'l que tuvo'l Farho Xixón Baloncestu sobre'l Cáceres pol resultáu de 87 a 78, que ye engañosu, pues los estremeños dominaron tola primera parte y punxéron-yos les coses mui difíciles a los xixoneses, asina nel segundu cuartu llegaron a ganar de venti puntos, 19 a 39, y al descansu teníen una ventaya de quince puntos.

Nesta primera parte l'equipu local taba totalmente desnortiáu y el Cáceres frayábalu en tol campu. Les coses camudaron na segunda parte con un gran xuegu de los asturianos y una remontada espectacular, pues metieron nesi periodu 52 puntos por 28 de los cacereños.

L'equipu xixonés ye agora cuartu, empatáu a venti victories col Caja Rioja y l'Almeria, y a dos del primer puestu. El próximu sábadu'l Farho Xixón vuelve a xugar en casa escontra'l Sabadell. L'entamu de los locales foi floxu y dende bien ceo los cacereños y garraron ventaya nel marcador, y mediáu'l cuartu yera de nueve puntos -6 a 15 y 8 a 17-, ehí un parcial de 8 a 0, permitió a los xixoneses averase a un puntu, 16 a 17, pero'l Cáceres, con cinco puntos siguíos de Panadadero, garró otra vegada ventaya nel marcador y a lo cabero'l periodu yera de siete puntos, 17 a 24.

Nel segundu cuartu los estremeños salieron mui fuertes y llograron un parcial de 15 a 2, poniendo la ventaya en venti puntos, 19 a 39. El Farho Xixón, sofitáu en Matt Kiefer y Adrián García, llogró baxar la desventaya a doce puntos -35 a 47-, pero'l resultáu yera mui favoratible pa un trunfu estremeñu, pues teníen quince puntos de ventaya, 35 a 50 cuando finó'l cuartu. Les coses camudaron tres el descansu y de principiu los locales llograron un parcial de 17 a 2, empatando l'alcuentru a 52. El Farho Xixón llogró ponese delantre nel marcador con triple de Curtis Bobb, 57 a 55, y cuando finó'l cuartu los xixoneses ganaben por un puntu, 61 a 60. Kiefer metió nesti periodu once puntos.

Nel caberu cuartu'l partíu taba igualáu con ventayes mínimes d'un y otru equipu, hasta qu'un 9 a 2 pa los xixoneses llevó 'l marcador a un 76 a 69, ello obligó a Piti Hurtado, entrenador cacereñu, a pidir tiempu muertu, y entá empataron a 78, faltando poco más d'un minutu, pero Matt Kiefer y sobre too Curtis Bobb, recuperando un balón y metiendo los siete últimos puntos xixoneses, dexaron el resultáu nesi 87 a 78 caberu.

Gran partíu de Mstt Kiefer (20 puntos, 5 rebotes y ficiéron-y 6 faltes personales), Brandon Wolfram (20 puntos y 8 rebotes) y Curtis Bobb (29 puntos, 5 rebotes y 3 asistencies).

Ficha técnica:

Farho Xixón Baloncestu:
Rubén Suárez (1), Curtis Bobb (19), Sony Vázquez (4), Brandon Wolfram (20) y Matt Kiefer (20).
Tamién xugaron: Adrián García (9), Peter Rajniak, Chus Pineda (7), José María Balmón y David Jandl (7).

Cáceres 2016:
Ricardo Busciglio, Kelvin Peña (15), Lui Felipe Gruber (21), José López Varela (4) y Harper Williams (16).
Tamién xugaron: Juan Sanguino (10), Alberto Aspe, Vassilios Kitsoulis, Lorenzo Díaz, José María Panadero (8) y Félix Ortiz (4).

Árbitrios: José Francisco Rodríguez Ávila y Enrique Miguel López Herrada.

Nel Farho Xixón Baloncestu nun hebo xugadores eliminaos por cinco faltes personales, nel Cáceres foi elimináu Harper Williams (minutu 39).

Partíu de la ventésima novena xornada de la Lliga Adecco LEB Plata, xugáu nel Palacio de los Deportes de La Guía.
Parciales per cuartos: 17-24, 18-26, 26-10 y 26-18."