Afonda la crisis nel Partíu Asturianista

Los militantes de la organización asturianista que quixeron constituyise en corriente d'opinión y a los que la dirección del partíu abrió procesu d'espulsión esplicaron ayeri en rueda de prensa les sos razones contra los argumentos pa echalos. Los críticos denuncien que la decisión d'espulsalos yá taba tomada enantes de la espulsión mesma, fechu que demostraría'l que la carta col espediente d'espulsión tenga fecha del 9 de payares, cerca d'un mes enantes de presentase la corriente crítica, de la que la dirección tuvo conocimientu'l 27 de payares, ello ye, cuatro díes enantes de presentase en público. Esto último baltiaría otru de los argumentos de la dirección del PAS pa la espulsión, que yera'l de presentase en público ensin alvertir al partíu

El grupu de militantes encabezáu por José Manuel Balbuena quexóse de la falta de democracia interna nel partíu, que nun tolera la convivencia con llinies de pensamientu alternatives a les de la dirección, al revés que nos demás partíos, y acusó d'esta falta de democracia a la persona de Xuan xosé Sánchez Vicente, que dixeron que lleva'l partíu d'una manera personalista y derechu al fracasu políticu. El colectivu críticu lleva dende la so presentación atropando sofitos y firmes de militantes, dellos n'activo y otros yá separtaos del llabor de la organización. Según los sos datos, los críticos representen a más del 25% de la militancia del PAS qu'asistió al últimu congresu celebráu en xunetu. Los críticos nun escuenden que la marcha d'esti volume de militancia supondría una crisis grave pa una organización yá mui dañada, anque la falta de criteriu de la dirección nun-yos permite albidrar que "escuros destinos" podría tener el partíu d'equí en p'alantre.

Los críticos apuntaron que ellos entovía nun tan fuera del partíu y que cuenten con defender la so pertenencia al PAS con tolos preseos llegales que puedan, aprovechando pa ello tanto los mecanismos llegales espeyaos nos reglamentos de réxime internu del Pas como la xusticia ordinario, a la qu'amenazaron con llegar casu de ser preciso. De cualquier manera, la organización nun-yos presenta garantíes abondes pa defendese nel procesu d'espulsión, y ye que'l tribunal que tien de tratar l'espediente nun se votó nel congresu del 26 de xunetu.