La bolsa valta toles marques

Selmana de ganancies con abultaes xubes en dellos índices. La captura de Sadam Hussein tiró p´arriba pelos mercaos xunta les bones estadístiques d'Estaos Xuníos. Los inversores tan faciendo un apueste pola renta variable anque entovía hai delles duldes alrodiu de les perspectives de crecimientu. L´Ibex tuvo otra selmana de xuba marcada por dellos másimos anuales siguíos, casu del sétimu másimu anual del selectivu Ibex-35, con volume hestóricu negociáu nel parqué madrilanu. Dempués de tres años de cayíes bursátiles, el pieslle del 2003 va ser la meyor llotería pa más d´un inversor.



La meyor estadística de la selmana foi'l datu de meyora de la economía d´Estaos Xuníos, que según un sondéu rexonal de la Reserva Federal va camín de tener un sólidu crecimientu l'añu qu'entra. Con un xorrecimientu económicu previstu del 4,3 % nel primer trimestre del 2004 y del 4,1% nel segundu. Ente les estadístiques de la Zona Euru destaquen el resultáu de la balanza comercial de la Xunión Europea, con 9.700 millones d´euros cuando se contaba con 7.500 millones. Otramiente, l´IPC francé tuvo una xuba d´una décima dientru les previsiones mentantu que los precios de producción alemanes nun cambiaron nin p´arriba nin p´abaxu. N´España el datu de pedíos industriales foi d´un 3,3% más.

Les bolses del Vieyu Continente tuvieron un pieslle selmanal positivu, sobremanera nos parqués de Londres y Francfort. Al otru lláu del Atlánticu Wall Street moderó les primeres ganancies xurdíes de l´anuncia de la captura de Sadam énte les munches sobre la igua del conflictu n´Iraq. Wall Street trancó dempués de munchos blincos col índiz Dow Jones algamó los 10.278,22 puntos con una xuba del 0,29% mentantu que´l tecnolóxicu Nasdaq tuvo unes perdes del 0,26% pa mangase nos 1.951,02 puntos.

Másimu históricu nel volume de contratación de la Bolsa de Madrid con 4.774 millones d´euros. L´Ibex-35 trancó'l vienres en 7.617,60 lo supón una xuba del 0,42%. La biotecnolóxica gallega Zeltia tuvo unes abultaes xubes dempués de que se diera anuncia de que'l rechazu de la comisión del EMEA pal so productu estrella, el Yondelis, foi mui raspiáu lo qu'abre espectatives pa que la siguiente vegada s'aprebe dafechu. Nel terrén de les ganancies destacaron Sogecable y FCC con xubes alrodiu´l 2,5. A la contra, Acerinox y Sacyr Vallehermoso tuvieron un pieslle en negativo. Si les dos últimes selmanes foron les de los chicharros esta selmana foi la de los blue chips col Grupu Telefónica como cabezaleru. Parte importante de les xubes nel parqué madrilanu emburrioles la medra de los fondos de pensiones que siempre se da a últimos d'añu.

La captura del dictador iraquín Sadam Husein, nun tranquilizó'l mercáu del oru prieto, que marcó un preciu de 30,55 dólares barril. L´euru sigue en xuba llibre con másimu tres másimu. A midía que la moneda europea medra respectu al dólar tamién medra la preocupación d´una perda perimportante na competitividá de les empreses esportadores europees. Nel pieslle del pasáu vienres l´euru algamó un cambéu de 1,2353 unidá dempués d´una xuba selmanal del 0,88%.