L'estáu de les telecomunicaciones

La compañía vasca de telefonía Euskaltel presentó esta selmana l'avance de resultaos del añu 2003. L'operador euskaldún cuenta con trancar l'añu por primer vegada en beneficios, 200.000 euros de saldu positivu qu'asitien a la operadora vasca como la primer operadora estatal alternativa a Telefónica que ye a sacar beneficios. 480.000 llinies de telefonía fixo y una tasa del 54% de les conexones a internet na Comunidá Vasca falen de la capacidá de la compañía vasca pa facese un güecu en mercáu contra la compañía cásique hexemónica nel Estáu, Telefónica. El trunfu d'Euskaltel nun tien comparanza con otres compañíes de telecomunicaciones del estáu, en cuantes que nenguna pue dicir que tien el 54% del mercáu d'internet y el 45% del de telefonía fixo. La vasca ye amás la única operadora de telecomunicaciones d'ámbitu autonómicu del estáu qu'entró al negociu de la telefonía movil, per aciu d'un alcuerdu con Amena. L'agresiva campaña d'Euskaltel nesta estaya (con regalos d'hasta 30.000 pestes en llamaes colos móviles) llevóla a tener el 31% del mercáu de telefonía móvil, rexistrando tal volume d'altes que la tecnoloxía de la compañía quedaba munches veces estragada.

Hasta equí podría pensase qu'esta noticia nun diz muncho pal públicu asturianu, que nin siquiera pue contratar servicios con Euskaltel, pero ello ye que l'anuncia de beneficios del operador vascu da pa una riestra de comparances, odioses a la fuercia, nes qu'el modelu de negociu y encontos "ideolóxicos" de la telefónica naranxa rescamplen énte la estremada situación de les telecomunicaciones n'Asturies. Pa entamar, Euskaltel ye una compañía participada pol Gobiernu Vascu, que va sacar tayada, evidentemente, del beneficiu a repartir y que tamién-y marca oxetivos a la empresa. Aparte d'esto, Euskaltel ye una compañía comprometida col usu del idioma, compromisu que s'espeya al traviés de convenios con instituciones rellacionaes col euskera y coles ikastoles, ello arriendes d'otres actividaes y patrocinios de calter vascu, casu del equipu de ciclismu, nel que los más de los deportistes son vascos. D'otra manera, mientres n'Asturies, depués de cinco años el cable sigue ensin salir de les llendes de la parte central d'Asturies, Euskaltel tien cableaos 48 conceyos vascos y el Gobiernu vascu tien aparte un plan de 12 millones d'euros pa llevar la banda ancho a los conceyos más pequeños d'equí al 2.007.

La comparanza del mundu de les telecomunicaciones ente Euskadi y Asturies fai un contraste mui fuerte. Mientres n'Euskadi sólo Euskaltel fizo una inversión de más de 900 millones d'euros pa esparder la rede de cable, un estudiu de Telecable que s'espublizó esta selmana reconoz que, anque Telecable invirtió un 14% más, la inversión global nel sector n'Asturies foi de 113 millones de euros, 68 menos que nel 2.002 y confirmando la tendencia a la baxa que llevamos dende'l 2.001. ¿Más datos? El sector enteru de telecomunicaciones asturianu según l'informe de Telecable da trabayu (directu o indirectu) a 2.100 persones n'Asturies y solo Euskaltel a más 5.000 nel País Vascu, onde, per otra parte esiste un Cluster d'empreses del sector que representen otros 7.900 emplegos (siempres según datos de les empreses). Esti cluster d'empreses presentó tamién esti añu unos datos distintos de los asturianos: ,medra la inversión en telecomunicaciones y la facturación de les empreses

Tampoco nun son too lluces nel camín de ta telefónica vasca, que va rexistrando bien de quexes pola mala calidá del serviciu, conflictos llaborales y que va atropando tamién estoyos de reclamaciones pol allugamientu de les antenes de telefonía móvil, sobremanera en conceyos gobernaos por EH, pero l'exemplu de la telefónica vasca ta cundiendo y esportándose a otros llugares; asina l'alcuerdu de gobiernu ente ERC, PSC y IC-Verts en Cataluña inclúi como ún de los puntos a desarrollar la creación d'operadores catalanos, ya seyan particulares o público-particulares, en sectores estratéxicos, ente ellos el de telecomunicaciones.