Fernández Pardo refuga l'equipu de trabayu propuestu por Ovidio Sánchez

"La presidenta del PP de Xixón, Pilar Fernández Pardo, mostró esti xueves públicamente'l so refugu al equipu de trabayu designáu pol presidente del PP d'Asturies Ovidio Sánchez dempués de les últimes elecciones xenerales, equipu que tendría de llevar a cabu l'anovación nel partíu y realizar trabayos previos a los congresos nacional y rexonal. El mentáu grupu ta encabezáu por Joaquín Aréstegui, Fernando Goñi y Agustín Iglesias Caunedo.

La intervención de Fernández Pardo tuvo llugar nel marcu del aconceyamientu estraordinariu del Comité Executivu rexonal d'esti xueves n'Uviéu. Na mesma llinia que Pardo mostráronse otros dirixentes 'populares' que tamién quixeron tomar la pallabra nun conceyu qu'entamó a les 12.00 hores y terminó al rodiu de les 14.00 hores.

Según fontes del PP, Fernández Pardo foi ""mui clara"" a la hora d'esponer los sos argumentos. ""Nun tuvi, nin toi, nin voi tar nesti grupu"", díxo-y la dirixente 'popular' a Ovidio Sánchez. Amás, Pardo espresó'l so refugu a esti tipu d'estructures y dixo que les cuestiones que tienen que ver cola aición del PP n'Asturies, incluyíes les relatives a la reforma estatutaria o presupuestos, han de decidise ""dientro de los sos muérganos del partíu"" y non fuera. Xixón, de fechu, tuvo un pesu importante nel conceyu d'esta mañana, onde na mesma llinia que Pardo s'espresaron miembros de la so xunta llocal, como Luis Crego o Paco Cubiella. Por embargu, les crítiques a esi grupu de trabayu nun se ficieron namás dende Xixón. Dalgunos hasta lo denomaron ""estructura paralela"" o ""triunviratu de sabios"".

El conceyu foi especialmente tensu con abondes intervenciones, a pesar de que nun primer momentu nun taben previstes entrugues. Sicasí, Ovidio Sánchez convidó a dalgún de los asistentes a intervenir, momentu qu'aprovecharon los dirixentes 'populares' pa pidir la pallabra de contino, encadenándose una serie d'intervenciones.

Manuel Rodríguez (Cangas del Narcea) agradeció a Ovidio Sánchez que se-y retirara la suspensión preventiva de militancia na so intervención. En tou casu, tamién reivindicó'l papel de la secretaría xeneral del partíu, encabezada por Reiniero Álvarez, y dixo que la so figura nun podía ser enterrada cuando los éxitos y los fracasos yeren aplicables a otres persones. El secretariu d'área de conceyos de baxa densidá del PP d'Asturies, Felipe Díaz Miranda, tamién foi otru de los dirixentes que garró la pallabra pa pidir ""respetu"" a los muérganos direutivos que nesti momentu existen nel partíu, pidiendo la convocatoria de xuntes direutives y cometíes pa poder dialogar dientro del partíu. Tamién faló l'actual secretariu xeneral del PP d'Asturies, Reiniero Álvarez, quien dixo que'l mayor patrimoniu del partíu yeren les xuntes llocales y los sos presidentes, cargando amás escontra Aréstegui. Señaló que los conceyos celebraos pol mentáu grupu de trabayu tuvieron llugar ensin la presencia nin del secretariu xeneral, nin d'otros dirixentes del partíu n'Asturies, que siguen controlando'l so cargu. Asina, refugó esa dinámica, apoyó a Pardo y dixo que nun había necesidá de formar otros muérganos.

Pela so parte, el diputáu nacional Isidro Fernández Rozada, criticó que dalgunos falaren de renovar sólo con poner xente mozo al frente de los cargos. Dixo qu'al so xuiciu lo importante ye la renovación d'idees y non d'edaes. Añadió qu'a él nun lu diba xubilar naide."