Asturies en 25 años de Constitución

La Constitución Española de
1978 cumple güei 25 años como testu supremu pol que se manda
l'estáu, y ello ye oxetu de conmemoración poles
instituciones oficiales. Aparte de les celebraciones oficiales del Gobiernu y
les instituciones españoles, dende la Xunta Xeneral del
Principáu (qu'estos díes celebra les tradicionales xornaes de puertes abiertes), Delegación del Gobiernu y partíos
políticos, que la emponderen como instrumentu de convivencia
política hasta les organizaciones empresariales como la FADE, que-yos
abulta que valió como ferramienta pal crecimientu de l'actividá
económica, emítense estos díes valoraciones en positivo
sobre'l valor de la Constitución y la so vixencia. Estos 25 años tamién abren el debate sobre posibles cambeos na Constitución, con PSOE y IU pidiendo que se reforme'l testu pa desaniciar la validación que fai de la llei sálica, que defende la llinia socesoria masculina nel accesu a la corona, y el reconocimientu de les autonomíes y del senáu como cámara de representación teritorial. Les valoraciones en positivo de la Constitución tampoco nun son unánimes, y asina la organización política Andecha
Astur, convoca güei una manifestación a les 12 na cai Uría
d'Uviéu contra una constitución qu'entienden que fai de menos la
identidá asturiana.



Al marxe de valoraciones polítiques, los 25 años de
constitución tamién valen pa facer repás de los munchos y
bultables cambeos económicos y sociales nestos 25 años. Asina lo
fai l'Institutu Nacional d'Estadística, qu'espublizó un llibru
que pue descargase enteru
dafechu n'internet y nel que compara dellos datos significativos d'estos 25
años. L'estoyu de datos del INE esplica datos interesantesqu'afecten a
tol estáu, como'l que en 1978 namás el 63,8% de les families
teníen pisu en propiedá, tantu por cientu que pasa güei al
84,6%, ello al mesmu tiempu que dobló la cantidá
d'empréstamos hipotecarios. Xunta les estadístiques que falen de
cambeos demográficos o de consumu, tamién hai tables qu'amuesen
como España contamina muncho más que va 25 años o la xuba
espectacular de cáncanos de toa triba, enfermedá que dobla y
triplica en dellos casos la incidencia que tenía nel 78 .