El Festival Derrame Rock rinde "Tributu a Dixebra"

"El Festival de música Derrame Rock, que tolos branos se celebra n'Asturies, va recuperar esti añu la so xornada del xueves pa rindir tributu al grupu Dixebra, que celebra'l so 20 aniversariu. Asina'l Festival, que ta previstu pa los díes vienres 18 y sábadu 19, va entamar el xueves 17, con una xornada previa de conciertu homenaxe, nel que van tomar parte miembros de dellos grupos asturianos.

Según los organizadores, ""esta fiesta homenaxe céntrase na presentación del nuevu discu de versiones 'Salú ya Dixebra, 20 años en 20 canciones', onde participen 21 grupos, interpretando cantares del míticu conxuntu, col fin de llevalu al direutu"".
De momentu ta confirmada la participación nel conciertu de miembros de los grupos: Fe de Ratas, Escuela de Odio, La Tarrancha, Skama La Rede, Chalaneru Sound System, Dark la Eme y Anarkía Positiva. Anque déxase abierta la posibilidá de que se sigan sumando grupos.

Amás, esti mesmu día va completar les actividaes el concursu de maquetes del Institutu Asturianu de la Mocedá y l'anunciada participación del grupu pravianu Marasmo, al que se suma Desakato. El preciu de la entrada pa esti día va ser de 20 euros, siendo de baldre pa quien tenga'l bonu del Derrame.

La organización recordó que les entraes del Festival tán a la venta na rede de 'ticktackticket' al preciu de 40 euros hasta'l día 17 de mayu. De magar esa fecha'l so preciu va ser de 54 euros."