Sofitu del SUATEA a la concentración pola oficialidá

"El Sindicatu Unitariu Autónomu de Trabayadores de la Enseñanza d'Asturies mostró esti xueves, al traviés d'un comunicáu de prensa, el so sofitu a la concentración convocada pol Conceyu Abiertu pola Oficialidá pal próximu llunes 14 d'abril a les 9:30 hores, delantre de la Xunta Xeneral del Principáu. La concentración coincide col aconceyamientu de los grupos parllamentarios pa debatir el testu de la reforma del Estatutu d'Autonomía d'Asturies.

El sindicatu manifestó ""la necesidá de que nel futuru Estatutu d'Autonomía d'Asturies la llingua asturiana seya oficial, como única ferramienta llegal que pue garantizar el respetu a los derechos civiles de tolos asturianos y asturianes"". Falando tamién de ""la sobrevivencia de la nuesa llingua, y qu'esti mesmu estatus tien que tenelu tamién el gallego-asturianu na zona que se fala"".

Pa Suatea ""la clas política nun pue vivir eternamente d'espaldes a la ciudadanía asturiana"". ""Nun pue zarrar los güeyos énte fechos tan claros como l'éxitu clamorosu de les marches pola oficialidá del 24 de payares del añu pasáu, o más de recién la gran acoyida de les I Xornaes sobre Llingua y Educación, organizaes pola Confederación Intersindical y Suatea"", señala'l testu. ""Daqué ta pasando y paez que los políticos nun se quieren enterar"", fina'l comunicáu."