Los ecoloxistes asturianos señalen un nuevu estudiu que rellaciona les incineradores col cáncer

"La organización ecoloxista Coordinadora Ecoloxista d'Asturies informó esti xueves, al traviés d'una nota prensa, que l'Institutu de Vixilancia Sanitaria de Francia (InVS) acaba de facer públicu un estudiu epidemiolóxicu (1) sobre l'afeición del cáncer nes proximidaes d'Incineradores de Residuos Sólidos Urbanos. Según la organización, yá son munchos los científicos pa los que queda clara la rellación ente vivir nel rodiu de les incineradores y l'aumentu de dalgunes enfermedaes.
Nesti sen, volvieron cargar escontra'l proyectu d'una ""super incineradora"" de residuos sólidos urbanos que'l Gobiernu del Principáu tien proyectáu pa Cogersa nel centru d'Asturies. ""Ye alloriante que se siga calteniendo esti proyectu cuando toles investigaciones establecen que la correllación ente la esposición a los fumos d'una incineradora y l'afeición del cáncer ye más que significativa"", señalaron los ecoloxistes.

Amás, los ecoloxistes señalaron que, daos los tiempos d'afeición pa los tipos de cáncer señalaos, ente la esplosión y l'apaición de la enfermedá (cinco años de leucemies y diez años pa otros tipos de cáncer) existe un ""riesgu grave"" de que los peligros fueren subestimaos y el riesgu d'apaición d'esti tipu d'enfermedaes seya tovía mayor. Añadieron que nel estudiu tamién se detectó una alta correllación ente la emisión de tres tipos de sustancies endémiques de les incineradores, a saber: dellos tipos de metales pesaos, una contaminación de dioxines, y PCB (policlorobifiles) y partícules clasificaes como PM10.

Amás tamién se vio una correllación ente'l depósitu de dioxines, PM10, metales pesaes y la so presencia na atmósfera. La Coordinadora mostróse preocupada porque siendo Asturies la rexón na que les estaciones de medición de la contaminación tán apurriendo los ""peores valores"" del estáu en dellos contaminantes, y onde según les investigaciones del Institutu de Salú Carlos II, la incidencia de de los tipos de cáncer ye mui superior a la media del país, ""les autoridaes sigan promoviendo instalaciones contaminantes que tienen efectos tan probaos""."