Vuelve'l gochu del país

Ayeri pela tarde presentóse l'asociacion asturiana de criadores de gochu celta, o "gochu del país". El presidente de la mesma, Leonardo
Fernandez, presentó a esti animal como una alternativa económica y un preséu na conservación del paisaxe



Morfolóxicamente, el gochu celta estrémase del gochu que toos
conocemos anguaño en que tien manches escures, en que ye mas llargu y sobremanera na forma de
la oreya, que ye más espurrida y rebalga p'abaxo, anque mayores son les
diferiencies per dientro, y ye qu'al dicir de los criadores estos son gochos
con unes cualidaes organoléptiques escepcionales que se concreten nuna
carne prieto y cola grasa entreverao, en cuenta de los depósitos d'untu
que presenten los gochos convencionales, ello amestao con una cría al
aire llibre en réxime estensivu o semiestensivu pue dar al final un
productu ensin nada qu'envidiar al meyor patanegra de Jabugo



Sicasí, esta raza de gochu, mayoritaria n'Asturies hasta bien
metíu el sieglu XX, tuvo nun tris de desapaecer pola meyor
adaptación a la producción intensiva d'otres races de gochos, que
fueron desaniciando al gochu celta hasta que namás quedaron d'elli pocos
exemplares, los más d'ellos en conceyos del occidente. Asina, los
miembros de l'asociación de criadores depués d'unos años
pañando los últimos exemplares del del país decidieron
formar una asociacion pa defender la raza y conservala, perro non solo con
aspiraciones de tener una curiosidá biolóxica metida na cubil, sinon
como alternativa económica. Como muestra en Galicia y Portugal la carne d'estos gochos cotízase a 40 euros el kilu.



Ello ye que'l tueru del gochu celta ta atoñando otra vuelta en Galicia y Portugal, territorios pelos qu'espardía los sos dominios y pelos qu'agora vuelve a criase. El retornu del gochu "d'oreya llarga" ta ayudando reactivar una economía agroganadera
xenerando un productu de altísimu valor añadíu
y de calidá. Asina ye qu'alredor d'ello funcionen yá pequeñes
industries de tresformación y ellaboración d'embutíu al tiempu que l'alministración subvenciona l'actividá con campañes de
promoción y infraestructures. Per otru llau, les universidaes gallegues y portugueses tienen convenios
de collaboracion pa estudios xenéticos sobre la raza, que,
básicamente ye del mesmu troncu racial que n'Asturies. L'Asociación de Criadores quer demostrar qu'estos gochos puen ser una alternativa
económica importante pa zones con tradición nello, casu de Tinéu, onde ye posible
praticar una ganaderia estensiva de gochos ensin aprovechar sin más recursos endóxenos que los montes comunales, que tan munches veces abandonaos o entregaos al ocalitu mientres carbayeres y castañales, que-yos dan l'alimentu a estos gochos, reculen ensin frenu.