Greenpeace denuncia presiones pa echala de la OMI

Un añu dempués de la catástrofe del Prestige, el debate sobre la seguridá nel tresporte marítimu ta más enraxonáu que nunca, y los organismos de control del tráficu de barcos son materia d'actualidá. Ello ye que la organización ecoloxista Greenpeace denunció esta selmana presiones de partes interesaes pa echala de la Organización Marítima
Internacional (OMI), organismu de la ONU responsable de
la seguridá nel
tráficu marítimu y de la llimpieza del oceanu. La OMI celebra estos díes, ente'l 24 de payares y el y el 5 d'avientu, una xunta de miembros na qu'un de los asuntos yera la espulsión de Greenpeace como organización con
estatus d'observador. Según Greenpeace, la propuesta d'espulsión venía afalada por estaos con banderes de conveniencia que tienen asientu na OMI, y tres d'ella taría la mano
de la industria del petróleu y de representantes de navieres que tienen estatus consultivu na OMI.

Les razones d'estos grupos de presión pa echar a Greenpeace encontábense en que la organización ecoloxista, coles sos acciones directes, casu de los bloqueos a barcos con contenedores radiactivos, balleneros y petroleros ente otros, supón un peligru pa la seguranza na navegación mundial. A la fin, na mesma sesión inaugural en qu'entamaba'l congresu, la OMI reculó y Greenpeace va poder siguir como observador dientro d'esti importante organismu.

Otramiente, en celebración del cabudañu del
Prestige, l'Atenéu Obreru de Xixón y Ecoloxistes n'Acción
organicen esta tarde una conferencia sobre los efectos ambientales de los
vertidos de hidrocarburos na que va participar el profesor
d'oceanógrafía de la Universidá d'Uviéu José
Luis Acuña. la cita ye a les 8 de la tarde nel Atenéu Obreru (C/Covadonga 7 - 1º)