El Parlamentu Européu quier boicotiar los XXOO si China nun fala col Dalai Lama

"El Parlamentu Européu pidió-y a los xefes d'Estáu y de Gobiernu de los Ventisiete que boicotiaren la ceremonia d'apertura de los Xuegos Olímpicos de Beijing si China nun acepta falar col Dalai Lama. El plenu de la Eurocámara aprobó una resolución na que condena ""la represión brutal exercida poles fuerces de seguridá chines escontra los manifestantes tibetanos"" y desixe la so lliberación darréu.

La resolución - aprobada por 580 votos a favor, 24 a la escontra y 45 abstenciones - tien el sofitu de cuasi tolos grupos políticos. Los parlamentarios piden-y a la presidencia eslovena un esfuerzu ""por algamar un posicionamientu conxuntu de la UE no que cinca a l'asistencia de los xefes d'Estáu y Gobiernu y del Altu Representante de la UE a la ceremonia d'inaguración de los Xuegos Olímpicos"", calteniendo ""la opción de nun asistir nel casu de que queden pesllaes les negociaciones ente les autoridaes chines y el Dalai Lama"".

El Parlamentu quier entamar asina mesmo una ""investigación abierta ya independiente, baxo'l mandáu de Naciones Uníes, sobre les griesques de les pasaes selmanes nel Tibet"". Solicitando-yos a los Ventisiete na resolución que ""sigan con procuru los acontecimientos"" y suxiriendo que los representantes diplomáticos de la UE en Beijing ""tomen la iniciativa y de visitar la zona pa poder informar al Conseyu sobre la situación d'anguaño"".

Nesti sen, el Parlamentu pide a les autoridaes chines ""qu'abran Tibet a la prensa y los diplomáticos estranxeros"", poniéndo-y el puntu a la censura de los sitios web de noticies y lliberando a tolos periodistes y ""ciberdisidentes"" deteníos en China por exercer el so drechu a la información."