L´euru, el petróleu y l´oru, en másimos

Selmana d'importantes correciones bursátiles nos principales parqués internacionales y marcada poles xubes de les materies primes y de la cotización de la moneda europeo. Amás los atentaos en Turquía asustaron a dellos inversores énte la posibilidá d´una mayor inestabilidá xeopolítico. L´Ibex tamién tuvo una selmana en negativo anque aguantó penriba los 7.000 puntos ensin problemes.



Nes bolses la recoyida de beneficios foi la norma. Les anuncies de los atentaos y la debilidá del dólar nun-yos prestaron a los brokers, que ficieron munches órdenes de venta. Les bolses del Vieyu Contiente tovieron una selmana en negativo anque´l vienres repuntaron toes por motivos técnicos sacantes la de Milán. La Bolsa de París foi la que tuvo menos perda tuvo nel pieslle de la selmana, anque en xeneral el volume de negociu foi mui feble. Al otru lláu del Atlánticu Wall Street repitió la secuencia de les bolses europees. L´índiz Dow Jones medró nel pieslle del vienres el 0,09% hasta los 9.628 puntos mentantu que´l índiz tecnolóxicu Nasdaq quedó en 1.893 puntos con una xuba del 0,64%.

Cola Bolsa de Madrid condicionada tola selmana a los movimientos a la baxa en Wall Street, l´Ibex-35 tuvo una perda selmanal del 2% hasta los 7.145 puntos, cayendo hasta'l mesmu vienres. L´anuncia de la selmana foi la cayida de la biotecnolóxica Zeltia al nun-y aceptar el recursu l´axencia del medicamentu n´Europa al rechazu a "yondelis" medicamentu estrella de la gallega, que nun va poder comercializar fármacos nuevos hasta´l 2006. Ente les xubes destacó Telefónica Móviles. Tamién xubió la tecnolóxica Avanzit dempués de que´l xuez llevantare la suspensión de pagos de la empresa. Gamesa y Sogecable tamién tuvieron xubes curioses.

Selmana de másimos en dellos precios de materies como'l petróleu. El preciu del barril Brent terminó en 29,95 dólares, lo que supón una xuba mui abultada y penriba de los 27 dólares qu'apauten los economistes como "preciu estable". Les reserves d´Estaos Xuníos nun medren, la situación d´Iraq ye cada vegada más complicada, el consumu enerxéticu crez y a la OPEP nun-y interesa una política de precios baxos. De fechu, nuna selmana los países de la OPEP van aconceyar pa revisar la estratexa de la organización, y lo más fácil ye que seya pa pesllar más el grifu.

L´euru foi tuvo otra xuba hestórica que llevó a la moneda común a algamar 1,1978 dólares -unidá el miércoles, repuntando'l vienres a 1,18 dólares. Esti nun ye un bon datu pa los esportadores europeos, y amás los estudios del BCE indiquen que de llegar la cotización a los 1,5 dólares la Zona Euru entraría en recesión económica. Nel mercáu de renta fixo los bonos a diez años tuvieron una xuba gracies a la inestabilidá de la renta variable, treslladando les perres de los inversores de les acciones a los bonos. Ello ye asina que'l bonu alemán a diez años rinde yá un 4,315%.

La otra perimportante xuba foi la del oru, que quedó penriba los 400 dólares - onza el miércoles pasáu, lo que supón másimu hestóricu en siete años. Estes xubes del metal mariello nun se recordaben dende enantes de la Guerra d´Iraq.