Candidatu nuevu pal nacionalismu gallegu

El Bloque Nacionalista Galego, segunda formación política de la vecina Galicia, remocicaba ayeri'l puestu de candidatu a la presidencia de Galicia. Tres de l'anuncia del veteranu Xosé Manuel Beiras de nun volver a presentase a les autonómiques nel 2.005, el nacionalismu gallegu llevaba tiempu especulando sobre quien podría ser el socesor del políticu que sacó cásique de la nada a esta formación, una confederación de partíos de distintes ideoloxíes qu'articula dende va más de venti años al nacionalismu gallegu y que nes últimes elecciones afitose como segunda fuercia gallega tres del intocable PP, anque rexistrando una relativa crisis que llevó al nacionalismu gallegu a entrugase si nun tocaren techu.

Tres d'un largu procesu, a la fin les úniques candidatures que se presentaron foron les del senador Anxo Quintana y les del eurodiputáu Camilo Nogueira. El trunfu de Quintana na votación d'ayeri con 1.740 votos contra los 517 de Nogueira nun foi una sorpresa, en cuantes que los más de los partíos que s'enxerten nel BNG, ente ellos UPG, Esquerda Nacionalista, Inzar y el PNG-PG, manifestaren que sofitaben la candidatura del senador d'Allariz. Más información nel portal gallegu Vieiros