6 Conceyos mandó nel pieslle del campeonatu

Ayeri celebrose en Lluanco la sesta y última preba de laPrimer Lliga Federativa de Deportes Tradicionales. Anque l'agua estropió'l día, el públicu nun dexó d'asistir a les competiciones, que se celebraron a lo llago de la tarde. La rodiada del campu fútbol del Marino foi l'escenariu pa les especialidaes de Tiru Cuerda en Poza (categoría de 480 Kg) y Llanzamientu Barra Asturiana, mientres que na Plaza de la Casa Conceyu ficiéronse les de Corta de Tueros con Hachu, Carrera de Llecheres y Tiru al Palu (hasta 80 Kg). L'equipu 6 conceyos foi ún de los grandes dominadores de la competición, copando dos formaciones d'esti club el primer y tercer puestu na preba de tiru de cuerda y los tres primeros puestos na carrera de llecheres, siendo'l trunfu pa José Manuel Camblor con una distancia recorría de 275 mts. Na corta con hachu, José Riesgo tamién llevó'l trunfu pa 6 Conceyos, marcando un tiempu de 5,06 en cortar la madera, más de minutu y mediu sobre Esteban Muñiz, del equipu Monte Areo.

Na preba de llanzamientu de barra, el trunfu foi pa Amador García, de Monte Areo, con 12,70 m, y la segunda plaza pa Juan Ramón Sierra, del equipu de la Comarca de la Sidra, que tiró a 12’29 m. El representante de 6 Conceyos, Conrado García, raspió la segunda plaza, pero quedó tereceru con 12,25. En tiru al palu, el trunfu marchó pal equipu de Perlora, con Jonatan García, siendo segundu y terceru Sergio Rodríguez de Monte Areo
y Fernando Díaz de 6 Conceyos.