Asturies acoyó al Conseyu Xeneral de la Emigración

Esta selmana celebrose n'Uviéu el Plenu del Conseyu de la Emigración. Esti órganu consultivu del
Ministeriu de Trabayu y Asuntos Sociales namás tenía hasta agora representación de Galicia, Madrid y Andalucía, les comunidaes con mas númberu d'emigrantes, mientres qu'Asturies taba fuera, ello con ser la cuarta CCAA del estáu en númberu absolutu d'emigrantes y la segunda si se cuenten los emigraos en rellación a la población. Canaries, otra Comunidá Autónoma con pesu emigrante, tamién yera la primer vez qu'asistía a un plenu d'esti órganu creau en 1.987.

Ún de los temes estrella d'esta xunta del Conseyu yera la cuestión de los nietos d'emigrantes. Los colectivos y instituciones d'emigrantes lleven tiempu faciendo una campaña mui fuerte al favor del derechu de los emigrantes de tercer xeneración a tener la nacionalidá española. La solución de compromisu a esti asuntu que propunxo esta selmana n'Uviéu la ministra d'Asuntos Esteriores, Ana de Palacio, nun satisfizo les aspiraciones de los emigrantes nesti sentíu. De Palacio esplicó que'l Gobiernu va da-yos a estos emigrantes de tercer xeneración visaos de trabayu por tiempu d'un añu como puerte a una hipotética doble nacionalidá que ganaríen en casu d'alcontrar trabayu. Lo que la ministra refugó foi la petición de los emigrantes de tener representación parlamentaria, encontándose pa ello en que pa facelo tendría de cambiase la Constitución.

Precisamente la de les elecciones foi otra de les cuestiones que salieron nel debate a lo llargo d'estos díes. Los representantes d'emigrantes aasturianos denunciaron que, del censu de más de 52.000 asturianos con derechu a votu na emigración (más del 5% del censu total) los más d'ellos nun pudieron votar porque nun-yos llegaron con tiempu les papeletes, y munchos de los que les mandaron ficiéronlo yá fuera de tiempu. Por poner un casu, nes autonómiques d'esti añu votaron 14.000 persones d'un total de 52.000, ello ye, poco más de la cuarta parte. El menos esplicable retrasu de les alministraciones españoles en mandar les papeletes y el de los servicios de corréu nestos países son los responsables d'esta situación.

La clausura del Conseyu valió pa que dellos políticos pasaren pel Auditoriu Príncipe Felipe d'Uviéu y ficieren declaraciones interesantes. Lo que más llamó l'atención, sacantes les declaraciones del ministru de trabayu Eduardo Zaplana diciendo qu'una Asturies que viviere del subsidiu nun tenía futuru, foi lo que dixo la conseyera de Vivienda y Bienestar Social Laura González comprometiose a que los emigrantes y los emigrantes retornaos diben tener prioridá a la hora de repartir el salariu social que'l principáu cuenta con aplicar d'equí a la vuelta d'un añu.

Ello ye que más de 3.000 asturianos na emigración dependen d'ayudes del Principáu