Los Trabayadores de la Normalización Llingüística píden-y "seriedá" a la Conseyería de Cultura

"La selmana pasada la Conseyera de Cultura y Turismu del Principáu d'Asturies, Encarna Rodríguez Cañas, y la Direutora Xeneral de Promoción Cultural y Política Llingüística, Consuelo Vega Díaz, facíen públicos los datos referentes al funcionamientu de les Oficines de Normalización Llingüística asturianes. Nesti sen, cifraben nun total de 162.458 euros les sovenciones concedíes a los servicios llingüísticos, cifra que cubriría'l funcionamientu de 9 servicios en 15 conceyos asturianos. Asina mesmo contabilizábense'l númberu de persones que teníen accesu a estos servicios, con un total de 564.369, lo que correspondería a más de la metá de la población asturiana.

Unos díes dempués y al traviés d'un comunicáu de prensa, l'Asociación de Trabayadores de la Normalización Llingüística valora estos datos como ""una tomadura de pelo"" que pretende ""vender como normalización social lo que nun se tendría por talo en nenguna sociedá del mundu"".

Dende'l puntu de vista de los Trabayadores de la Normalización, el ""prestixamientu de la nuesa llingua ye un procesu que necesita de vagar, pero que tienen de dir dándose pasos decidíos, con oxetivos claros y con un calandariu y una planificación seria"". En referencia direuta a la Conseyería de Cultura y Turismu consideren que ""tendría de xugar un papel mui importante que tovía nun ta xugando. Prometer oficines nueves, cuando'l Serviciu de Normalización Llingüística de Mieres lleva peslláu dende setiembre, paeznos una frivolidá"". Nesti sentíu, y no tocante a los datos económicos apurríos dende la Conseyería, valoren que ""esti sistema de financiación que vien demostrando añu tres añu que nun hai voluntá política d'asentar les bases d'un trabayu seriu y va funcionándose a güelpe de soluciones temporales, nel meyor de los casos"".

No que cinca a les polítiques concretes de normalización llingüística, l'Asociación de Normalizadores critica la falta d'oxetivos y planificación qu'amuesa'l Gobiernu del Principáu d'Asturies, Gobiernu al qu'acusa de falta d'implicación no rellacionao col asturianu. Esta falta d'implicación sería la causa, a xuiciu de l'Asociación, de l'actitú de la Conseyería de Cultura, a la que-y pide ""menos publicidá engañosa y más trabayu"".

Pa finar, recuerden l'especial momentu políticu que ta viviendo Asturies, coles negociaciones d'ellaboración del nuevu testu estatutariu, sorrayando que ""ye'l momentu de lluchar pola recuperación llingüística d'Asturies, empezando pol reconocimientu d'oficialidá pa l'asturianu"" y ""siguiendo con una planificación d'actuaciones normalizadores que lleven al asturianu al sitiu que-y correspuende""."