"Canteros" ye'l discu nuevu de Felpeyu

"Dempués de trés discos d'estudiu y ún en directo, y llevar más hores enriba del escenariu qu'en casa (ye un dicir), Felpeyu yá son unos veteranos de la música folk asturiana, una referencia obligada a la hora de falar de la música d'esti país nos últimos venti años. Agora'l grupu vuelve a sacar discu, pero que naide tenga duda de que Felpeyu sigue sonando a eso, a Felpeyu. Pa poder comprobalo namás hai qu'averase'l próximu sábadu día 12 al teatru Filarmónica d'Uviéu onde van presentar el so discu nuevu entituláu ""Canteros"".

Tres de pasar per momentos nada fáciles como tol mundu sabe bien, el grupu dióse un tiempu pa reencontrase y volver atopase no principal, tener gana de facer música, de tocar y d'espresar daqué. Resultáu d'esti trabayu posáu ye esti discu que ye fiel a la manera a la que-y gusta facer les coses a los felpeyos.

Asina topámonos con doce temes onde hai una mezcolancia de temes tradicionales y compuestos colos arreglos característicos del grupu. Muñeires, xotes y demás sones asturianos dominen dafechu'l discu, anque vuelve haber sitiu pa un tema castellanu ""Crescenciano"", cortesía y correspondencia col vallisoletanu vigulín del grupu Fernando Oyágüez. Los temes del grupu van sonanos familiares, tienen solera felpeyil como yera d'esperar, pero sí se nota la incorporación del baxu como instrumentu nuevu de la banda de la mano de Dudu Puente, que pon esi colchón pelos baxos, amás de cantar nos más de los temes con lletra.

Y ye nesi tema onde Felpeyu caltiénse tamién heriede del discu anterior ""YÁ!"" y de los anteriores, la importancia que tienen los temes cantaos nel discu. De los doce cortes del cd, seyes lleven lletra na que topamos otra vuelta un mecíu de tradición y creación, con lletres tradicionales (Ringorrango y El vieyu), trés del percusionista del grupu Ruma Barbero (Un cantar, La saya y Refalfiu) y una del desapaecíu Ígor Medio que s'inspiró nel cantar tradicional ""Canteros"" pa facer una lletra que ""quier ser un cantu a les persones anónimes, d'antaño y d'anguaño, que vienen de per ende -dexando tanto atrás, poniendo tanto en xuegu- cola voluntá de trabayar con dignidá y facer d'Asturies un sitiu meyor y más plural nel que vivir"", como bien diz el grupu.

Esti ""Canteros"" grabóse tamién mui al estilu de los felpeyos, que nun son mui amigos de les collaboraciones nos sos discos, daqué que quedó bien espeyao nesti cd nel que ta too grabao por ellos mesmos. L'estudiu escoyíu foi'l que yá ye una costume pa los grupos folk asturianos, ""Tutu"" de Corvera, echando cinco selmanes pa grabalu, dende últimos del 2007 a primeros de 2008. A la cai sal col sellu ""Tierra discos"", col que ya sacaren el discu anterior, y la producción fírmenla los propios felpeyos con Sergio Rodríguez y Tana. Pa finar, o casi, el diseñu del grupu sorprendenos sobre too pola manera en que'l grupu sal nes semeyes, embaxo l'agua. Ensin más pretensión que dicir que yá ye hora de tirase a la piscina, los miembros del grupu salen perbaxo de la llinia de flotación gracies a les semeyes submarines de Xurde A. Chachero, Paco Sandoval y Luisa Colado.

El grupu yá tien en cartera actuaciones que va llevalos a tocar per Asturies, Galicia, Cataluña y una xira per Italia pel branu; pero'l discu preséntase oficialmente esti sábadu día 12 nel teatru Filarmónica d'Uviéu a les 20:00 hores, la entrada ye de namás 5€. Una cita pa nun perdese y sentir bien de coses diferentes."