CiU gana les elecciones catalanes

El teóricu empate que daben les encuestes nes elecciones catalanes ente PSC-PSOE y Convergencia i Unió resolvióse a la fin na votación d'ayeri al favor de la coalición que preside Artur Mas, que ye la fuerza más votada con 46 escaños, quedando'l PSOE nuna segunda posición que ye poco pa les aspiraciones que tenía la candidatura de Pascual Maragall. La tercer fuerza más votada foi Esquerra Republicana de Catalunya, que dobló en votos y representación respective a les elecciones del 99. Con con 23 escaños y más de mediu
millón de votos, el partíu de Josep Lluis Carod - Rovira tien agora la llave del gobiernu catalán, que podría formase bien con una coalición ente CiU y ERC o con un tripartitu ente PSC, ERC y Iniciativa - Verds, otra fuerza que tamién xubió en representación pasando de 5 a 9 escaños. El partíu Popular catalán, que ponía de candidatu al ex-ministru Josep Piqué, tamién rexistró una medra de votu y representación, pasando de 12 escaños a 15 nel parlamentu catalán, anque la xuba ensin precedente d'ERC quíta-y a los populares l'estatus de tercer fuerza política del país.

Los titulares de la prensa de güei repártense a medies ente'l ganador de la votación, Artur Mas, y el sorprendente tercer clasificáu, Carod Rivira. El socesor del yá retiráu Jordi Pujol foi quien a caltener xunta la coalición histórica ente les dos fuerces del nacionalismu de centru-derecha catalán, afitando'l séptimu trunfu de CiU nunes elecciones catalanes. Les encuestes previes anunciaben una representación pa ERC d'ente 18-19 escaños, colo que la cifra final de 23 representantes que va tener la fuerza independentista nel "Parlament" nun puen calificase d'otro más qu'ésitu históricu pa un partíu que conoció periodos de crisis bien graves, como cuando tuvieron nun tris de desapaecer del mapa políticu tres de gobernar en coalición con CiU en 1980. ERC tien agora la llave del futuru políticu en Cataluña.

Les primeres declaraciones d'Artur Mas foron pa pidir a los sos seguidores qu'aposentaren dempués de la celebración y pa remembrar qu'entovía nun tien seguro el ser presidente. Maragall, que nun reconoz derrota, entiende que l'apueste del electoráu foi por un gobiernu d'izquierda, en referenciaa una posible xuntanza ente PSC, ERC y IC-Verts. Por ERC, Carod Rovira llamó a un gobiernu conxuntu de "concentración nacional" con representación de tolos partíos, mientres que Josep Piqué, que dio por bonu'l resultáu del PP, sorrayó que la xuba de votos d'ERC foi por culpa de CiU y PSC. Por IC-Verts, Joan Saura tamién aprebó los sos resultaos y coincidió en que'l pueblu pidiere ayeri un gobiernu d'izquierdes dempués de 23 años mandando la derecha.

Pa conocer meyor tolo rellacionao coles elecciones d'ayeri en Cataluña recomendamos la visita a Vilaweb, que tien un especial con abonda información y declaraciones y enllaces a les valoraciones de la prensa internacional.