Catalunya abre la puerta al usu terapéuticu del cannabis

"Un estudiu, financiáu pola Generalitat de Catalunya col sofitu de l'Axencia Española del Medicamentu, abre la puerta a un usu terapéuticu del cannabis nos pacientes crónicos que nun respuenden a tratamientos de referencia, amosando los bonos resultaos d'una melecina derivada del cannabis escontra los vómitos causaos pola quimioterapia.

La Conseyera de Salú, Marina Geli, aseguró que colos resultaos d'esti estudiu queda abierta ""una puerta a la esperanza"" pa los pacientes que nun respuenden a tratamientu, pero sorrayó que ""nun se ta falando d'un usu recreativu, sinón terapéuticu"" de la sustancia.

Los resultaos d'esti proyeutu, presentaos esti xueves por Marina Geli, amuesen la eficacia del ""Sativex"", que baxa la intensidá del dolor neuropáticu percibíu por pacientes con esclerosis múltiple, aumenta la sensación de fame en pacientes con síndrome d'anorexia-caquexia presente n'enfermos de Sida o cáncer terminal y amenorga los vómitos provocaos pola quimioterapia.

Esti programa esperimental fízose sobre una muestra de 207 pacientes, con un siguimientu d'un añu y mediu, pal que fizo falta una autorización de l'Axencia Española del Medicamentu, yá qu'ésta melecina nun ta aprobada n'España.

La Conseyera afirmó qu'a partir d'agora los médicos catalanes van poder preescribir ""Savitex"" a tolos pacientes que sufran les patoloxíes estudiaes nel programa, pero que va tener que ser al traviés de la vía del ""usu compasivu"" demientres que nun seya aprobáu por Europa, y cola autorización casu a casu de l'Axencia Española del Medicamentu, y nunca indicáu como primer opción."