Brian Cowen será'l próximu primer ministru d'Irlanda

"El ministru d'Economía irlandés, Brian Cowen, foi escoyíu esti miércoles cabezaleru del Fianna Fáil y candidatu a soceder al primer ministru, Bertie Ahern, dempués de qu'abandone'l cargu'l próximu 6 de mayu, tres tar implicáu nun escándalu de corrupción.

Cowen, únicu candidatu a la xefatura del partíu, foi escoyíu por unanimidá nel aconceyamientu estraordinariu que celebraron los miembros del grupu parlamentariu del Fianna Fáil en Dublín, según informa la prensa local. La so candidatura fuera promovida pol ministru de Xusticia, Brian Lenihan, y la ministra d'Agricultura, Mary Coughlan.

Cowen, de 48 años, y que yá ocupara la cartera d'Esteriores, será'l séptimu líder del Fianna Fáil y la oncena persona que recibe'l títulu de ""taoiseach"" (primer ministru), dende que se roblara la Constitución irlandesa en 1937.

El tovía ministru d'Economía dixera esti martes que nun piensa adelantar los supuestos cambios nel gabinete nin la política del Gobiernu hasta que nun tea oficialmente al frente del executivu. ""Les fontes puen ser too menos precises y les fontes que faen referencia a la futura composición del mio gabinete son especulatives dafechu"", señaló, según el ""Irish Times""."