El redactor de mediu ambiente de El Mundo echa per Cascos

"Cascos enllenó de galipote al Ministeriu de Mediu Ambiente, a tolos ministerios, a la Xunta de Galicia, a la costa cantábrica y a España entera. Manchónos el país, la concencia y la manera de trabayar, y por ello diéron-y la medalla d'oru de Galicia" Asina lo dicía Gustavo Catalán Deu, redactor de Mediu Ambiente del periódicu El Mundo y Premiu Nacional de Periodismu Ambiental , faló ayeri en Xixón sobre'l casu del Prestige y otros temes como los residuos nucleares

Les opiniones del periodista de El Mundo pudieron contrastase coles d'otru de los presentes en seminariu, el director de rellaciones de la Empresa Nacional de Residuos Atómicos, Enresa, Ricardo Manso. Manso esplicó lo avanzao de los sistemes de detección y almacenamientu de residuos nucleares nel estáu español, y afirmó qu'España, gracies a obres como'l desmantelamientu de la central de Vandellós 1, ye referencia mundial en xestión de residuos nucleares.

Como nun podía ser d'otra manera, nel coloquiu col públicu salió'l tema de l'apaición de residuos nucleares nuna empresa chatarrera de Xixón esti veranu y otros casos asemeyaos, como cuando Acerinox fundió nos sos fornos altos una pastiella de cesiu radiactivo que viniere con otra partida de chatarra. Manso esplicó que l'apaición de chatarra radiactivo nun yera responsabilidá de les empreses chatarrreres y que'l cesio podía proceder de cualquier otru país en cuantes que la chatarra ta "globalizada", defendiendo'l llabor de los sistemes de detección del Conseyu de Seguridá Nuclear. Gustavo Catalán retrucó-y indirectamente a Manso al esplica-yos a los presentes que'l casu d'Acerinox escapó a la rede de control española y detectóse primero nuna estación de control de los Alpes, un casu asemeyáu a cuando Suecia se decató, primero que los mesmos rusos, del escape de Chernobyl.